इराणचे नवे सर्वोच्च नेते मोजतबा खामेनेई रशियात? पुतिन यांनी विशेष विमान पाठवल्याचा दावा

Mojtaba Khamenei Health Update: अमेरिकन हल्ल्यात इराणचे नवे नेते मोजतबा खामेनेई यांनी एक पाय गमावल्याचे वृत्त आहे. रशियामध्ये त्यांच्यावर शस्त्रक्रिया झाली असून इराणने ही माहिती दडवली आहे.

मध्य आशियातील युद्धाने आता मुत्सद्दी आणि लष्करी स्तरावर एक नवे वळण घेतले आहे. इराणचे नवनियुक्त सर्वोच्च नेते मोजतबा खामेनेई यांना गुप्तपणे उपचारासाठी रशियाची राजधानी मॉस्को येथे नेण्यात आल्याचा दावा कुवैती वृत्तपत्र 'अल-जरीदा'ने केला आहे. रशियाचे राष्ट्राध्यक्ष व्लादिमीर पुतिन यांनी स्वतः विशेष विमान पाठवून खामेनेई यांना मदतीचा हात दिला असल्याचे समजते.

वृत्तानुसार, २८ फेब्रुवारी रोजी अमेरिकेने केलेल्या ज्या हवाई हल्ल्यात अयातुल्ला अली खामेनेई यांचा मृत्यू झाला, त्याच हल्ल्यात मोजतबा खामेनेई देखील गंभीर जखमी झाले होते. त्यांच्या पायावर आणि कंबरेवर शस्त्रक्रिया करण्यासाठी तज्ज्ञ डॉक्टरांची गरज होती. अशा परिस्थितीत पुतिन यांनी मोजतबा यांना मॉस्कोमध्ये उपचाराचा प्रस्ताव दिला.

कडक सुरक्षा आणि गुप्तता
मोजतबा खामेनेई यांना एका रशियन लष्करी विमानातून अत्यंत गुप्तपणे मॉस्कोला नेण्यात आले. सध्या ते पुतिन यांच्या निवासस्थानाजवळ असलेल्या एका खाजगी रुग्णालयात कडक सुरक्षेत असून त्यांच्यावर यशस्वी शस्त्रक्रिया झाल्याचे सांगितले जात आहे. रिपोर्टनुसार, त्यांचा पाय कापण्याची शस्त्रक्रिया यशस्वी झाली आहे. इराणच्या सर्वोच्च नेत्याने आपला पाय गमावल्याची बातमी जर जनतेपर्यंत पोहोचली, तर लष्कराचे मनोबल खचू शकते, या भीतीपोटी इराण सरकारने ही माहिती पूर्णपणे दडवून ठेवली आहे.

इराणचा नकार
दुसरीकडे, इराण सरकारने मात्र हे सर्व दावे फेटाळून लावले आहेत. "सर्वोच्च नेते पूर्णपणे निरोगी असून ते इराणमध्येच आहेत," असे अधिकृतपणे सांगण्यात आले आहे.

रशिया-इराण मैत्री अधिक गडद
पुतिन यांनी मोजतबा खामेनेई यांच्या नियुक्तीनंतर त्यांना 'अटळ पाठिंबा' जाहीर केला होता. आता थेट वैद्यकीय मदत देऊन रशियाने या युद्धात इराणच्या बाजूने आपण खंबीरपणे उभे असल्याचे जगाला दाखवून दिले आहे. यामुळे अमेरिका आणि इस्रायलच्या गोटात चिंतेचे वातावरण आहे. इराणचे सर्वोच्च नेते अशा प्रकारे शारीरिकदृष्ट्या हतबल झाल्याने इराणच्या आगामी युद्धनीतीवर मोठा परिणाम होऊ शकतो. दुसरीकडे, रशियाने मोजतबा यांना दिलेला हा आश्रय आणि मदत अमेरिका व इस्रायलसाठी एक मोठे आव्हान मानले जात आहे.