इराणविरुद्ध आता जुना शत्रू थेट युद्धात उतरणार, संधीचा घेणार फायदा; भारताचं टेन्शन का वाढणार?

इराण आणि UAE यांचे संबंध कायम तणावपूर्ण राहिले आहेत. हा संघर्ष दीर्घकाळापासूनच्या प्रादेशिक वादांमधून निर्माण झाला आहे.

दुबई - इराणविरुद्ध इस्रायल-अमेरिका युद्धाचे पडसाद आखाती देशांमध्ये उमटले. विशेषत: संयुक्त अरब अमीरात(UAE) इराणच्या टार्गेटवर होते. मागील ३ आठवड्यात इराणने यूएईवर २२०० हून अधिक मिसाइल आणि ड्रोन हल्ले केले आहेत. त्यामुळे UAE इराणवर संतापला आहे. बऱ्याचदा यूएईने हल्ल्याला प्रत्युत्तर देण्याची भाषा वापरली. आता UAE यापुढे जात इराणवर हल्ला करण्याच्या तयारीत आहे. म्हणजे UAE देखील इराणविरोधात अमेरिका-इस्रायलसोबत या युद्धात उडी घेऊ शकतो. 

वॉल स्ट्रीट जर्नलनुसार, UAE वरील हल्ले सहनशक्तीच्या पलीकडे गेले आहेत त्यामुळे इराणविरुद्ध तो लढाईत सहभागी होऊ शकतो. यूएईने जर युद्धात उडी घेतली तर त्याचा थेट परिणाम भारतावर होईल. संयुक्त अरब अमीरातमध्ये सर्वात मोठ्या संख्येने स्थलांतरित भारतीय समुदाय आहे. UAE मध्ये सुमारे ४२ लाख भारतीय राहतात. जे देशाच्या एकूण लोकसंख्येच्या अंदाजे ३५% आहेत. त्यामुळे संयुक्त अरब अमीरातमधील संघर्षामुळे भारताचं टेन्शन वाढणार आहे.

UAE युद्धात सहभागी होण्याच्या चर्चेला आणखी एका कारणामुळे बळ मिळाले आहे. अमेरिका इराणवर जमिनीवर आक्रमण करण्याचं प्लॅनिंग करत आहे. इराणचं स्ट्रेट ऑफ होर्मुझवरील नियंत्रण हटवण्यासाठी अमेरिका हे पाऊल उचलणार आहे. अमेरिका होर्मुझजवळील महत्त्वाच्या बेटांवर कब्जा करण्याचा प्रयत्न करणार आहे. त्यात युएई जमिनी हल्ल्याची सुरुवात करू शकते अशी इराणला शंका आहे. संयुक्त अरब अमीरातकडून (UAE) संभाव्य जमिनी हल्ल्याची गुप्त माहिती इराणला मिळाल्याचं तिथले अधिकारी सांगतात. UAE जमिनीवरील हल्ल्याची सुरुवात करेल आणि त्यानंतर त्यांच्या जमिनीचा वापर करून अमेरिकन सैनिक इराणमध्ये शिरतील असं इराणला वाटते. 

UAE कडून सातत्याने इशारा

संयुक्त अरब अमीरातने गेल्या काही दिवसांत इराणवर हल्ला करण्याचा सातत्याने इशारा दिला आहे. अलीकडेच अमेरिकेतील संयुक्त अरब अमीरातच्या राजदूतांनी म्हटले आहे की, इराणमधील केवळ शस्त्रसंधी पुरेशी ठरणार नाही. शस्त्रसंधीऐवजी प्रदेशात शांतता सुनिश्चित करण्यासाठी निर्णायक तोडगा काढण्यावर भर दिला पाहिजे असं त्यांनी सांगितले. यूएई आणि अमेरिकेची मजबूत भागीदारी आहे. इराणमधील इस्लामिक राजवटीसोबत कोणताही शस्त्रसंधी होऊ नये. दहशतवाद वाटाघाटी न करता संपवला पाहिजे अशी यूएईतील विश्लेषकांना वाटते. 

दरम्यान, इराण आणि UAE यांचे संबंध कायम तणावपूर्ण राहिले आहेत. हा संघर्ष दीर्घकाळापासूनच्या प्रादेशिक वादांमधून निर्माण झाला आहे. २०२० च्या अब्राहम करारानंतर संयुक्त अरब अमीरात इस्रायलच्या अधिक जवळ गेली आहे, ज्यामुळे दोन्ही देशांमधील तणाव आणखी वाढला आहे. होर्मुझच्या सामुद्रधुनीजवळ असलेल्या अबू मुसा आणि टोंब या सामरिकदृष्ट्या महत्त्वाच्या बेटांवरून संयुक्त अरब अमीरात आणि इराण यांच्यात वाद आहे. UAE मध्य पूर्वेत सुरू असलेल्या संघर्षाचा फायदा घेऊन ही बेटे ताब्यात घेऊ शकते अशी इराणला भीती आहे. संयुक्त अरब अमीरात आमच्याविरुद्धच्या युद्धात सक्रियपणे मदत करत आहे असं इराणने सातत्याने असा दावा करत आहे.