"दिसल्या की गोळ्या घाला आणि नष्ट करा"; खवळलेल्या डोनाल्ड ट्रम्प यांचे अमेरिकन नौदलाला आदेश

अमेरिकेने चर्चेसाठी पुढाकार घेतलेला असताना इराणकडून त्याला प्रतिसाद मिळत नसल्याचे दिसत आहे. त्यातच इराणने होर्मुझ सामुद्रधुनीमध्ये तीन मालवाहू जहाजांवर हल्ला केल्यानंतर आता डोनाल्ड ट्रम्प यांनी थेट गोळ्या घालण्याचे आदेश दिले आहेत.

"मी अमेरिकेच्या नौदलाला आदेश दिले आहेत की, इराणच्या सुरूंग पेरणाऱ्या बोटी दिसल्या की हल्ला करा आणि नष्ट करा. हे करताना अजिबात विचार करू नका", अशी माहिती अमेरिकेचे अध्यक्ष डोनाल्ड ट्रम्प यांनी दिली. ट्रम्प यांनी ट्रूथ सोशल मीडियावर एक पोस्ट केली आहे. अमेरिकेने शस्त्रसंधी वाढवल्यानंतर इराणकडून होर्मुझ सामुद्रधुनीत जहाजांवर हल्ले करण्यात आले. त्यानंतर ट्रम्प चांगलेच खवळले आहेत. 

डोनाल्ड ट्रम्प यांनी पोस्टमध्ये म्हटले आहे की, "मी अमेरिकन नौदलाला आदेश दिले आहेत की, होर्मुझ सामुद्रधुनीत सुरुंग पेरणारी बोट दिसली की गोळ्या घाला आणि नष्ट करा. मग त्या बोटी कितीही लहान का असेना (इराणच्या सर्व १५९ नौदलाच्या जहाजांना जलसमाधी मिळालेली आहे). यात अजिबात विचार करू नका." 

ट्रम्प पुढे म्हणाले की, "त्याचबरोबर आमचे 'माइन स्वीपर्स' सध्या ही सामुद्रधुनी स्वच्छ करण्याचे (पेरलेले सुरुंग शोधून नष्ट करण्याचे) काम करत आहेत. मी हे काम सुरू ठेवण्याचे, पण तिप्पट वेगाने करण्याचे आदेश देत आहे."

आम्हाला घाई नाही, चांगला तोडगा निघावा

यापूर्वी ट्रम्प माध्यमांशी बोलताना म्हटले होते की, "आम्हाला युद्ध घाईघाईत संपवायचे नाही. पण, आम्हाला एक चांगला तोडगा यात हवा आहे. इराणसोबतची शस्त्रसंधी वाढवण्याबद्दल आमच्यावर कोणताही दबाव नव्हता."

इराणचे राष्ट्राध्यक्ष काय म्हणाले आहेत?

अमेरिका-इराण यांच्यातील शांतता चर्चेबद्दल अजूनही स्पष्टता आलेली नाही. इराणचे राष्ट्राध्यक्ष मसूद पेजेश्कियान यांनी यावर भाष्य करताना म्हटले आहे की, इराण चर्चेचे स्वागतच करतो, पण धमक्या यात अडथळा बनू लागल्या आहेत. 

अमेरिकेकडून दुसऱ्या फेरीतील चर्चेसाठी इराणने पुढे येण्याची अपेक्षा व्यक्त केली जात असतानाच इराणच्या राष्ट्राध्यक्षांनी हे विधान केले आहे. 

"इराण चर्चा आणि कराराचे स्वागतच करतो आणि पुढेही करतच राहील. शब्द न पाळणे, नाकेबंदी करणे आणि धमक्या देणे हे सगळे चर्चेमध्ये अडथळे आणत आहे. तुमचा (अमेरिका) कधीही न संपणारा दुटप्पीपणा, दावे आणि काम यातील फरक जग बघत आहे", अशा शब्दात इराणच्या राष्ट्राध्यक्षांनी ट्रम्प यांना सुनावले.