'ऑपरेशन सिंधू' केवळ भारतीयच नव्हे, 'या' देशाच्या विद्यार्थ्यांनाही इराणमधून सुखरूप बाहेर आणणार!

भारताने आपल्या नागरिकांना सुरक्षितपणे मायदेशी आणण्यासाठी सुरू केलेल्या 'ऑपरेशन सिंधू' मोहिमेत आता नेपाळ आणि श्रीलंकेच्या नागरिकांनाही बाहेर काढले जाणार आहे.

इराण आणि इस्रायल यांच्यातील सध्याच्या संघर्षादरम्यान, भारताने आपल्या नागरिकांना सुरक्षितपणे मायदेशी आणण्यासाठी सुरू केलेल्या 'ऑपरेशन सिंधू' मोहिमेत आता नेपाळ आणि श्रीलंकेच्या नागरिकांनाही बाहेर काढले जाणार आहे. तेहरानमधील भारतीय दूतावासाने ही माहिती दिली आहे. भारतीय दूतावासाने 'एक्स'वर माहिती देताना म्हटले की, "नेपाळ आणि श्रीलंकेच्या सरकारांच्या विनंतीवरून, इराणमधील भारतीय दूतावासाच्या सुटकेच्या प्रक्रियेत नेपाळ आणि श्रीलंकेच्या नागरिकांचाही समावेश केला जाईल."

यापूर्वी शनिवारी, भारताच्या परराष्ट्र मंत्रालयाचे प्रवक्ते रणधीर जयस्वाल यांनी सांगितले की, आतापर्यंत ५१७ भारतीय नागरिकांना इराणमधून सुरक्षितपणे बाहेर काढण्यात आले आहे. त्यांनी माहिती दिली की, तुर्कमेनिस्तानची राजधानी अश्गाबात येथून २१ जून रोजी सकाळी ३:०० वाजता एक विशेष विमान नवी दिल्लीला पोहोचले, ज्यात इराणमधून बाहेर काढलेले भारतीय नागरिक होते. 

जयस्वाल यांनी 'एक्स'वर लिहिले, "ऑपरेशन सिंधू सुरू आहे. अश्गाबात, तुर्कमेनिस्तान येथून एक विशेष विमान २१ जून रोजी सकाळी ०३:०० वाजता नवी दिल्लीला पोहोचले. या उड्डाणासह आतापर्यंत ५१७ भारतीय नागरिकांची सुरक्षित वापसी झाली आहे."

नेपाळ आणि श्रीलंकेच्या नागरिकांनाही सुरक्षित बाहेर काढणार!
भारतीय दूतावासाने आपल्या नागरिकांसह नेपाळ आणि श्रीलंकेच्या नागरिकांनाही बाहेर काढण्यासाठी तातडीचे संपर्क क्रमांक आणि एक टेलीग्राम चॅनल जारी केले आहे. दूतावासाने म्हटले आहे की, ज्या कोणत्याही भारतीय, नेपाळी आणि श्रीलंकेच्या नागरिकांना इराणमधून बाहेर निघण्याची इच्छा आहे, त्यांनी तात्काळ दूतावासाशी संपर्क साधावा. यासाठी खालील तातडीचे संपर्क क्रमांक जारी करण्यात आले आहेत: +989010144557, +989128109115, आणि +9891281091091

इराण-इस्रायल संघर्ष काय आहे?
१३ जून रोजी इस्रायलने इराणच्या लष्करी आणि अणु ठिकाणांवर एक मोठा हवाई हल्ला केला, ज्याला "ऑपरेशन राइजिंग लायन" असे नाव देण्यात आले. याला प्रत्युत्तर म्हणून इराणच्या इस्लामिक रिव्होल्यूशनरी गार्ड कॉर्प्सने "ऑपरेशन टू प्रॉमिस ३" अंतर्गत इस्रायलच्या लढाऊ विमानांच्या इंधन उत्पादन केंद्रांवर आणि ऊर्जा पुरवठा ठिकाणांवर मोठ्या प्रमाणावर ड्रोन आणि क्षेपणास्त्र हल्ले केले. या संघर्षाला आज (२१ जून) नववा दिवस असून, परिस्थिती सातत्याने बिघडत चालली आहे.