ऑनलाइन टीम
इस्लामाबाद, दि. २४ - पाकिस्तानचे पंतप्रधान नवाझ शरीफ नरेंद्र मोदींच्या शपथविधी सोहळ्यास उपस्थित राहणार असल्याचे पाकिस्तानने स्पष्ट केले आहे. नवी दिल्लीमध्ये २६ मे रोजी संध्याकाळी राष्ट्रपती भवनाच्या प्रांगणात मोदी पंतप्रधानपदाची शपथ घेणार असून शरीफ यांनाही निमंत्रण धाडण्यात आले होते. भारत व पाकिस्तानचे कटू संबंध आणि हिंदुत्ववादी भाजपाबद्दल पाकिस्तानात असलेले संशयाचे वातावरण व इस्लामी मूलतत्ववाद्यांचा असलेला विरोध लक्षात घेता शरीफ यांच्या प्रतिसादाकडे सगळ्यांचे लक्ष लागले होते. अफगाणिस्तानातील भारतीय दूतावासावर झालेला दहशतवादी हल्लाही मोदीविरोधासाठी करण्यात आल्याचे मानले जात आहे.
या पार्श्वभूमीवर शरीफ यांनी घेतलेल्या भूमिकेकडे सकारात्मक दृष्टीकोनातून बघितले जात आहे. मोदी यांनी भारताच्या सगळ्या शेजा-यांना या सोहळ्यासाठी बोलावले असून आपण सहकार्यासाठी तयार असल्याचे सूचित केले होते. शरीफ यांनीही सहकार्यासाठी एक पाऊल टाकल्याचा संकेत दिला आहे. शरीफ यांनी पाकिस्तानी जनतेला भारताशी व्यापार वाढवण्याचे आश्वासन दिले होते. मोदी हे देखील आंतरराष्ट्रीय व्यापारी सहकार्याची भूमिका घेणारे असल्याने व्यापाराच्या माध्यमातून भारत पाक संबंध सुधारतात का याकडे सगळ्यांचे लक्ष असून ही एक सुरुवात असू शकते.
शरीफ यांच्या प्रतिनिधी मंडळामध्ये सल्लागार सरताझ अझिझ, विशेष सहाय्यक तारीक फतेमी व परराष्ट्र सचिव इझाझ चौधरी यांचा समावेश आहे. मोदींचा २६ मे रोजी शपथविधी झाल्यानंतर २७ मे रोजी मोदी व शरीफ यांच्यात बैठक होणार असल्याचे वृत्त आहे.
काँग्रेसच्या नेत्यांनी भाजपाच्या आमंत्रणाबाबत सावध प्रतिक्रिया व्यक्त केल्या आहेत. मनिष तिवारी म्हणाले की, दहशतवाद व बोलणी एकाचवेळी होऊ शकत नाही असं वारंवार म्हणणारी भाजपा नंतर कसा प्रतिसाद देते हे महत्त्वाचं आहे. त्याचप्रमाणे मुंबईवर झालेल्या हल्ल्याच्या कामकाजाबाबत व तिथं लपलेल्या दहशतवाद्यांसंदर्भात पाकिस्तानच्या दिरंगाईबाबत भाजपा काय मत व्यक्त करते हे बघणं महत्त्वाचं आहे.
तर राजीव शुक्ला यांनी शिवसेनेचे खासदार नवाझ शरीफ यांच्या उपस्थितीत मंत्रिपदाची शपथ घेताना दिसतील अशी खिल्ली उडवणारी प्रतिक्रिया व्यक्त केली आहे.