इराणमध्ये निसर्गाचा हाहाकार! इस्रायली हल्ल्यानंतर तेहरानमध्ये पडला 'काळा पाऊस'; जनजीवन विस्कळीत

Black Rain in Iran: इस्रायलने इराणच्या तेल रिफायनरींवर केलेल्या हल्ल्यानंतर तेहरानमध्ये काळा विषारी पाऊस पडला आहे. फोर्ब्सच्या रिपोर्टनुसार, या पर्यावरणीय संकटामुळे इराणमध्ये खळबळ उडाली आहे. वाचा सविस्तर.

तेहरान: इराण आणि इस्रायलमधील युद्ध आता केवळ क्षेपणास्त्रांपुरते मर्यादित राहिले नसून, त्याचे भयंकर पर्यावरणीय परिणाम समोर येऊ लागले आहेत. इस्रायलने इराणच्या तेल शुद्धीकरण प्रकल्पांवर केलेल्या भीषण हवाई हल्ल्यानंतर, इराणची राजधानी तेहरानमध्ये 'काळा विषारी पाऊस' पडल्याची धक्कादायक घटना घडली आहे. फोर्ब्सने दिलेल्या वृत्तानुसार, या प्रदूषणामुळे शहरात आरोग्य आणि पर्यावरण आणीबाणी निर्माण झाली आहे.

इस्रायली हल्ल्यात इराणचे मोठे तेल साठे आणि रिफायनरी जळून खाक झाल्या. या आगीतून निर्माण झालेला प्रचंड काळा धूर, राख आणि घातक रसायने आकाशात ढगांमध्ये मिसळली गेली. रविवारी जेव्हा तेहरानमध्ये पाऊस झाला, तेव्हा हा पाऊस काळ्या रंगाचा आणि चिकट स्वरूपाचा होता. यात मोठ्या प्रमाणात हायड्रोकार्बन्स आणि विषारी कण असल्याचे तज्ज्ञांचे म्हणणे आहे.

आरोग्यावर गंभीर परिणाम
या विषारी पावसामुळे तेहरानमधील नागरिकांना श्वास घेण्यास त्रास, डोळ्यांची जळजळ आणि त्वचेचे विकार जडणार आहेत. प्रशासनाने नागरिकांना घराबाहेर न पडण्याचे आवाहन केले आहे. तसेच, या पावसामुळे पिण्याच्या पाण्याचे स्रोत आणि शेतीचेही मोठे नुकसान होण्याची भीती व्यक्त केली जात आहे.

युद्धाचा पर्यावरणाला तडाखा
युद्धामुळे केवळ जीवितहानी होत नाही, तर निसर्गाचाही मोठा ऱ्हास होत असल्याचे या घटनेने सिद्ध केले आहे. तेहरानमधील हा काळा पाऊस म्हणजे जागतिक पर्यावरणासाठी धोक्याची घंटा मानली जात आहे.