इराणने रशियाकडे मागितली मदत; परराष्ट्र मंत्री अराघची यांनी मॉस्कोमध्ये पुतिन यांची घेतली भेट

Iran Israel War Latest news: खामेनेई यांना ठार मारण्याची शक्यता तसेच इराणमध्ये सत्तापालट करणे या विषयावर अमेरिकेचे राष्ट्राध्यक्ष डोनाल्ड ट्रम्प यांनी जाहीर मतप्रदर्शन केले आहे.

तेहरान : इस्रायलशी सुरू असलेल्या युद्धादरम्यान, इराणचे सर्वोच्च नेते अयातुल्ला अली खामेनेई यांनी रशियाचे अध्यक्ष व्लादिमीर पुतिन यांची मदत मागितली आहे. इराणचे परराष्ट्र मंत्री अब्बास अराघची यांनी मॉस्कोमध्ये पुतिन यांची भेट घेतली आहे. अराघची यांनी पुतिन यांची भेट घेत रशियाचा पाठिंबा मागितला आहे. रशियाच्या पाठिंब्यावर इराण अद्याप खूश नाही. मात्र, इराणला रशियाकडून कोणत्या प्रकारची मदत हवी आहे हे अद्याप स्पष्ट झालेले नाही.

खामेनेई यांना ठार मारण्याची शक्यता तसेच इराणमध्ये सत्तापालट करणे या विषयावर अमेरिकेचे राष्ट्राध्यक्ष डोनाल्ड ट्रम्प यांनी जाहीर मतप्रदर्शन केले आहे. जर तसे घडले तर मध्यपूर्वेत अस्थिरता निर्माण होऊ शकते. ही स्थिती रशियाला नको आहे. 

इराणचा अणुकार्यक्रम विकसित करण्यात रशियाने मोलाची मदत केली आहे. त्यामुळे खामेनेई यांनी अमेरिकेच्या हल्ल्यानंतर मदतीसाठी पुतीन यांना पत्र लिहिले आहे. इराण व अमेरिकेमध्ये मध्यस्थी करण्याची रशियाने याआधीही तयारी दर्शविली होती.

इराणचे सशस्त्र दल प्रमुख अब्दुलरहीम मौसवी म्हणाले की, आमच्या अणुस्थळांवर अमेरिकेने केलेल्या हल्ल्यांना आम्ही तितकेच आणि कठोर प्रत्युत्तर देऊ. इस्रायली पंतप्रधान नेतान्याहू यांना वाचवण्याचा निर्णय घेऊन ट्रम्प यांनी मोठी चूक केली आहे. नेतान्याहू जोपर्यंत आयुष्यातून उठणार नाहीत तोपर्यंत इराण नेतान्याहू यांना शिक्षा देत राहील, असे त्यांनी म्हटले आहे.

युद्ध आणखी भडकण्याची भीती

अमेरिकेने इराण-इस्रायलच्या युद्धात हस्तक्षेप केल्याने तसेच इराणवरील अणुकेंद्रांवर मारा केल्याने हे युद्ध आणखी भडकण्याची भीती व्यक्त होत आहे. इतर देशही यात भरडले जाण्याची भीती आहे. 

जगाचा आण्विक धोका टळला आहे : इस्रायल

संयुक्त राष्ट्रसंघाच्या सुरक्षा परिषदेची बैठक इराणच्या विनंतीवरून बोलावण्यात आली होती. यात इस्रायलचे राजदूत डॅनी डेनन यांनी अमेरिकेने इराणवर केलेल्या हल्ल्याचे समर्थन करत जगासमोर असलेला धोका संपला असल्याचे नमूद केले.

इस्रायलने इराणला कित्येक वर्षापासून संधी दिली; परंतु हा देश ऐकण्याच्या मनःस्थितीत नव्हता. म्हणूनच इस्रायलने पावले उचलली. आमच्या हल्ल्यातशेकडो इराणी सैनिक ठार झाले आहेत, असे इस्रायलने माहिती देताना सांगितले.

ट्रम्प यांनी केली त्यांच्याच मागण्यांची थट्टा : काँग्रेस

इराणवर हल्ले करून अमेरिकेचे अध्यक्ष डोनाल्ड ट्रम्प यांनी त्या देशासोबत संवाद सुरू ठेवण्याच्या स्वतःच्याच मागण्यांची थट्टा केली आहे, असे काँग्रेस पक्षाने सोमवारी म्हटले. अमेरिकेच्या बॉम्बहल्ल्यांविषयी, इस्रायलच्या आक्रमकतेविषयी केंद्र सरकारने टीका किंवा निषेध केलेला नाही. ही अयोग्य कृती आहे. भारताने इराणसोबत तातडीने चर्चा करणे आवश्यक आहे, असे काँग्रेसने म्हटले आहे.

४४३ भारतीयांची सुटका

इस्रायलमध्ये अडकलेल्या ४४३ भारतीयांना सोमवारी दुसऱ्या टप्प्यात सुरक्षितपणे बाहेर काढण्यात आले. यामुळे गेल्या दोन दिवसांत सुटका झालेल्या भारतीयांची एकूण संख्या ६०३ झाली आहे. १९ जूनला भारत सरकारने 'ऑपरेशन सिंधू'ची घोषणा केली. इस्रायलमध्ये सध्या ४०,००० हून अधिक भारतीय आहेत.

हल्ल्यासाठी भारतीय हवाई क्षेत्राचा वापर नाही

अमेरिकेने इराणवर हल्ला करण्यासाठी भारताच्या हवाई क्षेत्राचा वापर केला या सोशल मीडियावरील काही खात्यांवरून करण्यात आलेला दावा केंद्र सरकारने फेटाळला आहे. अमेरिकेने रविवारी पहाटे इराणमधील तीन अणुकेंद्रांवर बॉम्बहल्ले केले. त्या पार्श्वभूमीवर भारताबाबत ही अफवा पसरविण्यात आली होती. सरकारने म्हटले की, इराणवर हल्ला करण्यासाठी अमेरिकेने भारताचा वापर केलेला नाही.