मोठी बातमी! रियाधमधील अमेरिकन दूतावासावर ड्रोन हल्ला, भीषण आग; अमेरिकेने आपल्या नागरिकांना तात्काळ 'मिडल ईस्ट' सोडण्याचे दिले आदेश

Iran Israel US War Live updates : सौदी अरेबियातील अमेरिकन दूतावासावर ड्रोन हल्ल्यामुळे भीषण आग लागली आहे. अमेरिकेने आपल्या नागरिकांना तातडीने मध्य-पूर्व सोडण्याचे आदेश दिले आहेत.

रियाध/वॉशिंग्टन: पश्चिम आशियातील युद्ध आता एका अशा वळणावर पोहोचले आहे, जिथून परतीचा मार्ग कठीण दिसत आहे. सौदी अरेबियाची राजधानी रियाधमधील अमेरिकन दूतावासावर भीषण ड्रोन हल्ला झाला असून, यामुळे दूतावासाच्या परिसरात मोठी आग लागली आहे. या घटनेनंतर अमेरिकेच्या स्टेट डिपार्टमेंटने अत्यंत कडक 'ट्रॅव्हल ॲडव्हायझरी' जारी करत, मध्य-पूर्वेतील सर्व अमेरिकन नागरिकांना तातडीने देश सोडण्याचे आवाहन केले आहे.

रियाधमधील अतिसुरक्षित समजल्या जाणाऱ्या अमेरिकन दूतावासाला इराण समर्थित गटाने ड्रोनद्वारे लक्ष्य केले. या हल्ल्यात दूतावासाच्या इमारतीचे मोठे नुकसान झाले असून परिसरात आगीचे लोट दिसत आहेत. अद्याप जीवितहानीबद्दल अधिकृत माहिती मिळालेली नाही.

अमेरिकेचा 'इव्हॅक्युएशन' आदेश
परिस्थिती हाताबाहेर जात असल्याचे पाहून अमेरिकेने आखाती देशांत राहणाऱ्या आपल्या सर्व नागरिकांना सुरक्षित स्थानी हलवण्याचे किंवा तातडीने मायदेशी परतण्याचे आदेश दिले आहेत. "सध्याची परिस्थिती अत्यंत अस्थिर असून कोणत्याही क्षणी मोठा लष्करी संघर्ष होऊ शकतो," असा इशारा अमेरिकेने दिला आहे.

विमानतळांवर एकच गर्दी
अमेरिकेच्या या आदेशानंतर दुबई, अबु धाबी आणि रियाध विमानतळांवर पाश्चात्य नागरिकांची मोठी गर्दी पाहायला मिळत आहे. अनेक विमान कंपन्यांनी आपली उड्डाणे रद्द केल्याने प्रवाशांचे हाल होत आहेत.

इराणचा आक्रमक पवित्रा
इराणने आधीच 'होर्मुझ सामुद्रधुनी' बंद केली असून, आता अमेरिकन लष्करी आणि राजनैतिक ठिकाणांना लक्ष्य करण्यास सुरुवात केली आहे. अमेरिकेने या हल्ल्याचा बदला म्हणून इराणच्या मुख्य तळांवर 'कार्पेट बॉम्बिंग' करण्याची तयारी सुरू केल्याचे सूत्रांचे म्हणणे आहे.