ऑनलाइन लोकमत
नवी दिल्ली, दि. ०१ - इझ्रायलला भेट देणारे पहिले भारतीय पंतप्रधान अशी नवी ओळख नरेंद्र मोदी मिळवणार आहेत. भारत-इझ्रायलचे संबंध सौहार्दाचे असले तरी इझ्रायलचे शत्रू असलेल्या मुस्लीम देशांना व भारतातील मुसलमानांना काय वाटेल या चिंतेने आजतागायत एकाही भारतीय पंतप्रधानाने मित्रराष्ट्र असलेल्या इझ्रायलला भेट दिली नव्हती. मात्र, या वर्षातच परराष्ट्रमंत्री सुषमा स्वराज इझ्रायल, जॉर्डन व पॅलेस्टिनला भेट देतील व नंतर मोदी इस्झायलला भेट देतील असे स्वराज यांनी सांगितले.
भारत व पाकिस्तान संबंधांबाबत बोलताना भारताची भूमिका स्पष्ट आहे आणि त्यात कोणतीही धरसोडगिरी होणार नाही असे सांगताना भारत - पाकिस्तान क्रिकेट डिप्लोमसीचा कोणताही प्रस्ताव विचाराधीन नसल्याचेही स्वराज यांनी सांगितले.
नरेंद्र मोदी इझ्रायलला भेट देणारे भारताचे पहिले पंतप्रधान ठरतील याबरोबरच त्यांचे इझ्रायलचे पंतप्रधान बेंजामिन नेत्यानाहू यांच्याशी मैत्रीचे संबंध असणे महत्त्वाचे आहे.
भारताने इझ्रायलला १९५० साली मान्यता दिली पण लगेचच संयुक्त राष्ट्रांत इझ्रायलविरोधात मतदान केले. त्यानंतर १९९१ नंतर नरसिंहराव सरकारच्या काळात इझ्रायलशी राजनैतिक संबंध प्रस्थापित करण्यात आले.
ज्योती बसू, जसवंत सिंग, एस. एम. कृष्णा व लालकृष्ण अडवाणी यांच्यासारख्या भारतीय नेत्यांनी इझ्रायलला भेटी दिल्या. तर मोशे दायान, शिमॉन पेरेझ आदी इझ्रायलच्या नेत्यांनी भारताला भेट दिली आहे.