अमेरिका, रशिया, ब्रिटन अणि फ्रान्स...; इस्रायल-इराण युद्धात कोणता देश कुणाच्या बाजूने? समोर आली लिस्ट

ईश्वराच्या मदतीने, आपण आणखी बरेच टप्पे गाठणार आहोत, असे इस्रायलचे पंतप्रधान बेंजामिन नेतन्याहू यांनी म्हटले आहे...

इस्रायलनेइराणवर केलेल्या हल्ल्याची संपूर्ण जगभरात चर्चा सुरू आहे. या हवाई हल्ल्यात इस्रायलने शुक्रवारी इराणच्या अण्वस्त्र तळांवर, मिसाइल्स आणि लष्करी तळांवर  हल्ला करण्यासाठी ‘ऑपरेशन रायझिंग लॉयन’ सुरू केले. या हल्ल्यात इराणचे अनेक लष्करी कमांडर आणि शास्त्रज्ञ मारले गेले आहेत.  यासंदर्भात भाष्य करताना, "आपण एक अत्यंत यशस्वी प्रारंभिक हल्ला केला आहे. ईश्वराच्या मदतीने, आपण आणखी बरेच टप्पे गाठणार आहोत." असे इस्रायलचे पंतप्रधान बेंजामिन नेतन्याहू यांनी म्हटले आहे.

इस्रायल आणि इराण यांच्यात युद्ध सुरू झाल्यानंतर, जगातील अनेक देशांच्या प्रतिक्रिया समोर आल्या आहेत. यातील काही देशांनी इस्रायलला तर काही देशांनी इराणला पाठिंबा दिला आहे. तर काही देशांनी तटस्थ भूमिका घेतली आहे. इस्रायलला पाठिंबा देणाऱ्या देशांत अमेरिका, ब्रिटन, फ्रान्स, जर्मनी, स्वीडन, चेक रिपब्लिक, ऑस्ट्रेलिया, न्यूझीलंड यांचा समावेश आहे. याचवेळी, रशिया, चीन, इजिप्त, तुर्की, पाकिस्तान, इंडोनेशिया, इराक, ओमान, सौदी अरेबिया, कतार, संयुक्त अरब अमिराती, लेबनॉन, हौथी, हमास, अफगाणिस्तान आदींनी इस्रायलविरुद्ध इराणला पाठिंबा दिला आहे. तर ज्यांनी दोन्ही देशांना संघर्ष कमी करण्याचे आवाहन केले आहे, त्यांत संयुक्त राष्ट्र, भारत, जपान, आयर्लंड, आफ्रिकन युनियन, युरोपियन युनियन, इटली यांचा समावेश आहे.

जॉर्डनने हाणून पाडले इराणी ड्रोन -
इस्रायलने इराणच्या अण्वस्त्र ठिकाणांवर हल्ला केल्यानंतर, दोन्ही देशातील तणाव शिगेला पोहोचला आहे. यानंतर, इराणने प्रत्युत्तर देत इस्रायलवर ड्रोन हल्ले केले. मात्र इराणकडून करण्यात आलेले सर्वच्या सर्व ड्रोन हल्ले इस्रायल आणि जॉर्डनच्या सैन्याने यशस्वीपणे हाणून पाडले. इराणी ड्रोन हाणून पाडण्यासाठी जॉर्डनकडून इस्रायली सैन्याला विशेष मदत मिळत आहे. खरे तर, या भागात जॉर्डन हा इस्रायलचा खास सहकारी आहे आणि त्याला सातत्याने मदत करत असतो. जॉर्डनच्या सरकारी माध्यमांनी दिलेल्या वृत्तानुसार, त्यांच्या सैन्याने आज सकाळच्या सुमारास आपल्या हवाई हद्दीत प्रवेश केलेले अनेक मिसाइल्स रोखले. या मिसाइल आणि ड्रोनच्या सहाय्याने इराणने इस्रायलवर हल्ला केला होता. मात्र जॉर्डनने ते हवेतच  हाणून पाडले. महत्वाचे म्हणजे, जॉर्डनने त्यांची हवाई सीमाही तात्पुरती बंद केली आहे. 

आमची हवाई हद्द म्हणजे, युद्धाचे मैदान नाही - 
यासंदर्भात भाष्य करताना जॉर्डन म्हणाला, आपण आपले हवाई क्षेत्र युद्धाचे मैदान होऊ देणार नाही आणि आपल्या हवाई हद्दीत कुठल्याही प्रकारचे उल्लंघन सहन करणार नाही. इराण-इस्रायल यांच्यातील तणाव शिगेला पोहोचला असतानाच जॉर्डनचे हे विधान केले आहे. जॉर्डनच्या एका बाजूला इस्रायल आणि त्याने कब्जा केलेला वेस्ट बँक आहे. तर दुसऱ्या बाजूला इराणचा शेजारी इराक आहे. यामुळे इस्रायलवर हल्ला करण्यासाठी इराणच्या दृष्टीने जॉर्डनची हवाई हद्द महत्वाची आहे.

इस्रायलच्या हल्ल्यानंतर इराणचे प्रत्युत्तर - 
ऑपरेशन रायझिंग लायन अंतर्गत इस्राइलने इराणमध्ये हवाई हल्ले करत अणुकेंद्र, लष्करी तळ, अणुशास्त्रज्ञ आणि बड्या लष्करी अधिकाऱ्यांना लक्ष्य केल्यानंतर, इराणनेही ऑपरेशन प्रॉमिस सुरू करून इस्राइलवर जोरदार प्रतिहल्ला केला असून, इस्राइलच्या जवळपास प्रत्येक भागाला शेकडो क्षेपणास्त्रे आणि ड्रोनच्या माध्यमातून लक्ष्य करण्यात आले आहे. त्यामुळे इस्राइलमध्ये आणीबाणीची परिस्थिती निर्माण झाली असून, नागरिकांना तातडीने तळघरांमध्ये आश्रय घेण्याचे आदेश देण्यात आले आहेत. दरम्यान, इस्राइलच्या संरक्षण यंत्रणांनी इराणकडून करण्यात आलेल्या क्षेपणास्त्र हल्ल्यातील बहुतांश क्षेपणास्त्रं रोखण्यात आल्याचा दावा केला आहे. मात्र या हल्ल्यात काही इस्राइली नागरिक जखमी झाल्याचं वृत्त आहे. दरम्यान, या हल्ल्यात 78 जणांचा मृत्यू झाला असून 329 जण जखमी झाल्या आहेत, असे इराणने म्हटले आहे. तर इस्रायलने 20 जण मारले गेल्याची पुष्टी केली आहे.