कुरुंदा (जि. हिंगोली) : वसमत - औंढा महामार्गावरील भेंडेगाव फाट्यावर गुरुवारी झालेल्या विचित्र अपघातात दोन मोटारसायकलला जीपने पाठीमागून जोरदार धडक दिल्याने दोन मोटारसायकलस्वारांचा जागीच मृत्यू झाला, तर एकजण गंभीर जखमी झाला आहे. याप्रकरणी मंगळवारी जीपचालकाविरोधात कुरुंदा पोलीस ठाण्यात गुन्हा दाखल करण्यात आला आहे.
भेंडेगाव फाट्याजवळ गुरुवारी प्रमोद कोकाटे व फिर्यादी राजाराम कोकाटे हे मोटारसायकलने (क्र. एमएच ३८ टी ७४१३) व अन्य एक जण एमएच ३८ झेड ९४४३ या क्रमांकावरील मोटारसायकलने औंढ्याकडे जात होते. त्याच वेळी पाठीमागून निष्काळजीपणे व भरधाव वेगाने येणाऱ्या जीपने (क्र. एमएच २५ ए २३४४) दोन मोटारसायकलला जोरदार धडक दिली. या विचित्र अपघातात प्रमोद कोकाटे, अन्य एक असे दोघे मोटारसायकलस्वार ठार झाले आहेत. या अपघातात फिर्यादी राजाराम कोकाटे गंभीर जखमी झाला आहे.
जीपचालकाच्या निष्काळजीपणामुळे हा अपघात घडला आहे. दोघांच्या मरणास कारणीभूत ठरल्याने फिर्यादी राजाराम कोकाटे यांच्या तक्रारीवरून कुरुंदा पोलीस ठाण्यात जीप चालकाविरोधात गुन्हा दाखल करण्यात आला आहे. पुढील तपास सहाय्यक पोलीस निरीक्षक सुनील गोपीनवार हे करीत आहेत.