ऑक्सिजन, रेमडेसिविरच्या वापरावर मर्यादा रहाव्यात, रुग्णांची लूट होऊ नये, यासाठी या खासगी कोविड सेंटरधारकांना विविध मार्गदर्शक सूचनाही देण्यात आल्या होत्या. यामध्ये डॉक्टरांच्या ड्युटीपासून ते इतर सुविधांबाबतची माहिती देण्यास सांगण्यात आले होते. सर्वात महत्त्वाचे म्हणजे या रुग्णालयात दर महिन्यात दाखल झालेल्या रुग्णांची एकूण संख्या व तेवढ्यांना दिलेली देयके ही माहितीही सादर करण्यास सांगण्यात आले होते. मात्र, अद्याप कुणीच ही माहिती सादर केली नसल्याचे जिल्हा शल्यचिकित्सक डॉ. राजेंद्र सूर्यवंशी यांनी सांगितले. तर देयकांबाबत काही तक्रार असेल तर नागरिकांनी जिल्हा सामान्य रुग्णालयातच गणेश सोळंके यांच्याकडे तक्रार नोंदवायची होती. मात्र, तशी कुणाची लेखी तक्रारही आली नाही. अनेकजण बाहेर तोंडी ओरड करीत असले तरीही खासगी रुग्णालयांनी अवाजवी देयक आकारून तेवढ्या रकमेचे देयक न दिल्याची तक्रार काही नोंदविली गेली नाही.
नोटिसा देणार
याबाबत जिल्हा शल्यचिकित्सक डॉ.राजेंद्र सूर्यवंशी यांना विचारले असता ते म्हणाले, जिल्हाधिकाऱ्यांनी दिलेल्या मार्गदर्शक सूचनांचे पालन या रुग्णालयांनी करणे गरजेचे आहे. दर महिन्याच्या पाच तारखेला देयके सादर करणे बंधनकारक असून पाच दिवस जास्तीचे लोटले तरीही देयके आली नाहीत. जिल्हाधिकाऱ्यांच्या परवानगीने संबंधितांना नोटिसा देण्यात येतील.
अशी आहेत रुग्णालये
महेश कोविड हेल्थ सेंटर हिंगोली ३० बेड, नाकाडे कोविड हेल्थ सेंटर हिंगोली २५ बेड, आयकॉन कोविड हेल्थ सेंटर हिंगोली ३०, माऊली कोविड हेल्थ सेंटर हिंगोली २०, तिरुमला कोविड हेल्थ सेंटर हिंगोली २०, शिवम कोविड हेल्थ सेंटर १५, पतंगे कोविड हेल्थ सेंंटर वसमत १७, सातपुते कोविड हेल्थ सेंटर २०, विवेकानंद कोविड हेल्थ सेंटर वसमत २०, द्वारका हॉस्पिटल हिंगोली २५, जगदंब हॉस्पिटल हिंगोली ४० अशी २८२ रुग्णक्षमतेची १२ रुग्णालये आहेत. १० रोजी या ठिकाणी ऑक्सिजनवरील ९० तर विनाऑक्सिजनचे ६९ रुग्ण दाखल होते. तर ९० ऑक्सिजन बेड रिकामे होते.