जनावरांच्या चाऱ्याचे नियोजन लागेना

हिंगोली : कोरोना संसर्गापासून बचाव करण्यासाठी प्रत्येकजण काळजी घेत असताना मुक्या जनावरांकडे दुर्लक्ष होताना दिसत आहे. सध्या जिल्ह्यात किती चारा शिल्लक आहे ?, टंचाई जाणवल्यास काय नियोजन करणार ? या प्रश्नाचे दोन्ही पशुसंवर्धन कार्यालयाकडे उत्तर नाही. चारा नियोजनासंदर्भात पशुसंवर्धन उपायुक्त कार्यालय व जिल्हा परिषदेचे पशुसंवर्धन कार्यालय एकमेकांकडे बोट दाखवित असल्याचे चित्र आहे.

कोरोनामुळे प्रत्येकजण आपापल्या आरोग्याची काळजी घेत आहेत. मात्र कोरोना रोखण्याच्या धावपळीत मुक्या जनावरांकडे मात्र साफ दुर्लक्ष होत आहे. जिल्ह्यात मागील पावसाळ्यात चांगला पाऊस झाल्याने माळरानासह पडीक जमिनीवर चांगले गवत उगवले होते. त्यात जमिनीत ओलावा असल्याने अनेकांनी ज्वारी, मका पिकाची पेरणी केली होती. यातूनही काही प्रमाणात चारा उपलब्ध झाला. परंतु, पावसामुळे सोयाबीन, तूर, मूग, उडीद पिकाचे नुकसान झाले. त्यामुळे चारा म्हणून वापरले जाणारे कुटार अपेक्षित उपलब्ध झाले नाही. त्यामुळे खरीप हंगामापर्यंत चारा शिल्लक राहणार की नाही, याबाबत ठोस कोणालाही सांगणे आवघड झाले आहे. जिल्ह्यात किती चारा शिल्लक आहे ? चारा टंचाई जाणवल्यास काय उपाययोजना कराव्या लागणार ? याची जबाबदारी कोणी उचलायची याबाबत जिल्हा परिषदेचा पशुसंवर्धन विभाग व पशुसंवर्धन उपायुक्त कार्यालयामध्ये चालढकल सुरू आहे. दोन्ही कार्यालये एकमेकांकडे बोट दाखवित आहे. यातून चारा उपलब्धतेचे नियोजनच केले नसल्याचे स्पष्ट होत आहे.

कर्मचारी कोरोनाच्या विळख्यात

जिल्हा परिषदेच्या पशुसंवर्धन विभाग व पशुसंवर्धन उपायुक्त कार्यालयातील बहुतांश कर्मचारी कोरोना बाधित आढळले आहेत. त्यामुळे कामकाजावरही परिणाम होत असल्याचे अधिकारी सांगत आहेत. दोन्ही कार्यालयात मोजकेच कर्मचारी उपलब्ध होते.

जिल्ह्यातील पशुधन

गाय वर्गीय - २,२९,७५६

म्हैस वर्गीय - ७३,९२०

मेंढ्या - १६,७४२

बकऱ्या - १,४६,७८२

डुकरे - १०४८

चारा नियोजनाची जबाबदारी जिल्हा परिषदेच्या पशुसंवर्धन विभागाची आहे. जिल्ह्यातील चाऱ्याची सद्य:स्थिती काय आहे, याची माहितीही त्यांच्याकडेच असते. तरीही चार ते पाच दिवसांत चाऱ्यासंदर्भात आढावा घेऊन माहिती गोळा केली जाईल.

- डॉ. लक्ष्मण पवार, उपायुक्त, पशुसंवर्धन उपायुक्त कार्यालय

चारा नियोजनाची जबाबदारी पशुसंवर्धन उपायुक्त कार्यालयाची आहे. त्यांच्याकडेच चाऱ्यासंदर्भातील माहिती मिळेल. आगामी काळात चारा टंचाई जाणवू नये, यासाठी मका बियाणे देण्याचे नियोजन आखले आहे.

- डॉ. जावळे, पशुसंवर्धन अधिकारी, जि.प. हिंगोली