जिल्ह्यात ४५ वर्षांवरील सर्वांना लस दिली जात आहे. लसीकरणासाठी नागरिक गर्दी करीत आहेत. मात्र, काही मद्यपी शंका उपस्थित करीत आहेत. याबाबत थेट विचारणाही होत आहे. लस घेतल्यानंतर किती दिवसांनंतर मद्यपान करावे?, आहारात काय घ्यावे व काय घेऊ नये? यासारखे प्रश्न विचारले जात आहेत. लसीकरण व मद्यपान याचा फारसा संबंध नाही, तसेच यासंदर्भात संशोधनही झाले नसल्याचे दिसून येत आहे. त्यामुळे मद्यपान करणे टाळलेलेच बरे, असे मत जाणकारातून व्यक्त होत आहे. तसेच मद्यपान करायचेच झाले तर लसीकरणापूर्वी व लसीकरणानंतर दाेन आठवडे मद्याचे अतिसेवन टाळावे. कोरोना लसीकरणामुळे रोग प्रतिकार शक्ती निर्माण होणे अपेक्षित असते. तिला अतिमद्य सेवनाने बाधा येण्याची शक्यता नाकारता येत नाही. त्यामुळे मद्यसेवन टाळलेलेच बरे असा सल्लाही वैद्यकीय क्षेत्रातील तज्ज्ञ देत आहेत.
फेब्रुवारी महिन्यात झालेली दारू विक्री (बल्क लिटर)
देशी दारू -४०६८०४
विदेशी दारू -९९०९५
बीअर -६२१८९
मुळात शरीरासाठी मद्यसेवन घातकच आहे. त्यामुळे कोण्याही नागरिकांनी मद्याचे सेवन करणे टाळावेच. कोरोना लसीकरणानंतर किमान दोन आठवडे व पूर्वीही मद्य सेवन करणे टाळावे.
- डॉ. गोपाल कदम, निवासी वैद्यकीय अधिकारी, हिंगोली
मद्यसेवनाने शरीरावर दुष्परिणाम होतात. त्यामुळे नागरिकांनी मद्यसेवन करणे टाळावेच. लसीकरणास नागरिकांचा प्रतिसाद चांगला आहे.
-राजेंद्र सूर्यवंशी, जिल्हा शल्यचिकित्सक
कुठेही ठोस निष्कर्ष नाहीत
कोरोना लस घेतल्यानंतर साधारणत: तीन आठवड्यामध्ये अँटिबॉडी तयार होतात. मद्यपान व लसीकरणाचा प्रभाव कमी होण्याबाबत कुठेही ठोस निष्कर्ष नाहीत. मात्र, अतिमद्यप्राशन केल्याने प्रतिकार क्षमता कमी होते, अशी चर्चाही नागरिकांतून होत आहे.