हिवरा तर्फे जवळा येथील प्रल्हाद लोणे यांचे वय ५० आहे. ते चौथीत असताना वडिलांचे निधन झाल्यामुळे त्यांना शाळा, रोजमजुरी करून कुटुंबाचा उदरनिर्वाह करावा लागला. त्यांची वेगळी ओळख म्हणजे ते एक हजारापर्यंतचा पाढा सहजतेने म्हणतात. पाढा म्हणताना सहजतेने पाढ्यातील पुढची संख्या तोंडात येत असल्याचे ते म्हणाले. मोबाइल क्रमांक एकदा कोणी सांगितला की, दीर्घकाळ स्मरणात राहतो. त्यांची अंकातील स्मरणशक्ती दांडगी असून, त्या संबंधीची गोष्ट ते विसरत नाहीत. एकदा मोबाइल नंबर सांगितल्यास त्यांना हा नंबर तोंडपाठ होतो. ही त्यांची आगळीवेगळी ओळख निर्माण करण्यास मदत हाेत आहे. प्रल्हाद लोणे यांना मुलगा, दोन मुली असून, मुलीचे लग्न झाले. मुलगा बीसीएसचे शिक्षण घेत आहे.
डोंगरकडा येथे ८ ते १० दिवसांपूर्वी प्रल्हाद लाेणे हे हरभरा विकण्यासाठी गेले होते. त्याठिकाणी त्यांचा पाढा म्हणण्याचा व्हिडिओ बनवून तो व्हायरल करण्यात आला. हा व्हिडिओ बहुतांश जणांनी पाहिला असून, प्रत्येक जण त्यांच्या सहजतेने म्हणत असलेल्या पाढ्याची व ज्ञानाची अनेक जण स्तुती करीत आहेत.
पाढे येत असून ते गणितीय आकडेमाेड सहजतेने करतात. शिक्षण कमी झाल्याची खंत मात्र त्यांनी व्यक्त केली. कोणताही पाढा म्हणतात तेव्हा पुढची संख्या आपोआप तोंडी येते याबाद्दल विचारले असता, ही कोणती शक्ती अथवा कल्पना नसल्याचे त्यांनी सांगितले. एक हजारापर्यंत सहजतेने पाढे येत असल्याने शासनाने याची दखल घेत विद्यार्थ्यांना जास्तीत जास्त पाढे अवगत व्हावेत व अंकगणित सहजतेने सोडविता यावे यासाठी माझ्याकडून ज्ञान विद्यार्थ्यांपर्यंत पोहोचवल्यास विद्यार्थ्यांना याचा नक्कीच फायदा होईल, असे त्यांनी सांगितले.
फाेटाे नं. ०५