आरोग्य विभागाच्या भोंगळ कारभाराने रुग्णांना त्रास

सडक/अर्जुनी तालुक्यातील शेंडा प्राथमिक आरोग्य केंद्र चर्चेचा विषय बनला आहे. वारंवार मागणी करुनही जिल्हा आरोग्य अधिकाऱ्यांकडून डॉक्टर उपलब्ध करून देण्यास टाळाटाळ केली जात आहे.

शेंडा/कोयलारी : सडक/अर्जुनी तालुक्यातील शेंडा प्राथमिक आरोग्य केंद्र चर्चेचा विषय बनला आहे. वारंवार मागणी करुनही जिल्हा आरोग्य अधिकाऱ्यांकडून डॉक्टर उपलब्ध करून देण्यास टाळाटाळ केली जात आहे. याठिकाणी एकच डॉक्टर असल्याने रुग्णांना वेळेवर सेवा मिळत नसल्याची ओरड होत आहे.
या प्राथमिक आरोग्य केंद्रांतर्गत चार उपकेंद्र व चोवीस गावांचा समावेश आहे. परंतु सर्व कार्यभार एकाच डॉक्टरवर अवलंबून असल्याने रुग्णांना वेळेवर सेवा मिळणे कठीण होते. तत्कालीन जिल्हा अधिकाऱ्यांनी पैशाच्या हव्यासापोटी पुनर्नियुक्त्यांची खैरात वाटली. नविन पदारूढ झालेल्या जिल्हा आरोग्य अधिकाऱ्यांकडे लक्ष पुरवायला वेळ नाही व त्यामुळे शेवटी रुग्णच सेवेअभावी भरडला जातो. ७ जून रोजी दुपारी येथील नागरीक नुतन बंसोड हा आपल्या घराची छावणी करत असताना त्याच्या हाताला सिमेंट पत्र्यांनी दुखापत झाली. तो उपचार घेण्याकरिता आरोग्य केंद्रात गेला असता तेथे फक्त बोरकर नावाची शिपाई होती. तीनेच मलमपट्टी करून दिली.
शेंडा परिसर आदिवासी क्षेत्रात मोडत असून नक्षलग्रस्त भाग म्हणून त्याची ओळख आहे. याठिकाणी प्राथमिक आरोग्य केंद्राची सुसज्य इमारत आहे.
शासनाकडून आरोग्य सेवेचा धिंडोरा पिटला जातो. परंतु वास्तविकता वेगळीच आहे. एकच डॉक्टर असल्याने त्यांचेकडे मिटींग, रिपोर्ट, सर्व्हे यासारख्या अनेक कामांचा भार आहे. त्यामुळे ते २४ तास सेवा देऊ च शकत नाही. अनेकदा येथील आरोग्य केंद्रात रुग्णांची ओरड होते. सेवेअभावी कित्येकांनी त्या डॉक्टरवर ताव मारला. प्रसार माध्यमांव्दारे वारंवार डॉक्टरची मागणी करण्यात आली. परंतु जिल्हा आरोग्य अधिकाऱ्यांनी येथील प्राथमिक आरोग्य केंद्राकडे पाठ फिरविल्याचे चित्र दिसून येत आहे. येथील डॉक्टर शासकीय कामानिमित्त अथवा रजेवर गेले असता दुसरा डॉक्टर नसल्याने रुग्ण सरळ बातमीदाराच्या घरावर हल्ला चढवून आपली कैफियत मांडतानाचे चित्र बरेचदा घडले. तरी जिल्हा आरोग्य अधिकाऱ्यांनी या गंभीर समस्येकडे जातीने लक्ष पुरवून २४ तास सेवा देण्यासाठी या प्राथमिक आरोग्य केंद्राला त्वरीत डॉक्टर उपलब्ध करून देण्याची मागणी परिसरातील जनता करीत आहे. (वार्ताहर)