मुरगाव नगराध्यक्षपदी भावना भोसले

 वास्को : मुरगावच्या नगराध्यक्षपदी भावना भोसले यांची निवड झाली आहे, तर उपनगराध्यक्षपदी जेरी फर्नांडिस हे बिनविरोध निवडले आहेत. नगराध्यक्षपदासाठी निवडणुकीत भावना भोसले यांनी प्रतिस्पर्धी सुनीता लान्डिस यांचा १३ विरुद्ध ७ मतांनी पराभव केला. दि. २६ मे रोजी नगराध्यक्षा तारा केरकर व उपनगराध्यक्ष सैफुल्ला बशीर खान यांच्यावर अविश्वास ठराव आणून त्यांना या पदांवरून पायउतार व्हावे लागल्यानंतर नव्याने ही पदे भरण्यासाठी नगरविकास संचालनालयातर्फे पालिका मंडळाची शुक्रवारी सकाळी खास बैठक बोलविली होती. या बैठकीला वीसही नगरसेवक हजर होते. अतिरिक्त संचालक-२ येनकॉन ए. एल. परेरा यांनी निवडणूक अधिकारी म्हणून काम पाहिले. मुख्याधिकारी यशवंत तावडे आणि साहाय्यक कर अधिकारी येळेकर यांनी त्यांना सहकार्य केले. आरंभी उपनगराध्यक्षपदासाठी एकच अर्ज दाखल झाल्याने जेरी फर्नांडिस यांची या पदावर बिनविरोध निवड झाल्याचे निवडणूक अधिकार्‍यांनी अधिकृतपणे जाहीर केले. त्यानंतर नगराध्यक्षपदासाठी निवडणूक घेण्यात आली. या पदासाठी भावना भोसले व सुनीता लान्डिस यांचे अर्ज सादर झाले होते. निवडणूक अधिकार्‍यांनी दोन्ही उमेदवारांना अर्ज मागे घेण्यासाठी १५ मिनिटांचा अवधी दिला. मात्र, या वेळेत कुणीही अर्ज मागे घेतला नाही. त्यानंतर झालेल्या मतदानात भावना भोसले यांना १३ तर सुनीता लान्डिस यांना ७ मते पडल्याने भोसले या नगराध्यक्षपदी निवडून आल्याचे निवडणूक अधिकार्‍यांनी जाहीर केले. हा निकाल विरोधी गटासाठी धक्कादायक ठरला. कालपर्यंत विरोधी गटाच्या बाजूने ९ नगरसेवकांचे बळ होते. या गटाला शहरातील एका उद्योगपतीचे समर्थन होते. त्यांच्या मदतीने सत्ताधारी गटातील एक-दोन नगरसेवक आपल्या गटात ओढून सत्ताधारी गटाला धक्का देण्याचा विरोधकांचा विचार होता. मात्र, नगरसेवक तथा वास्कोचे आमदार कार्लुस आल्मेदा व वीजमंत्री मिलिंद नाईक यांनी या उद्योगपतीला शह देण्यासाठी विरोधी गटातील दोन नगरसेवकांनाच आपल्या बाजूने वळवल्याने नगराध्यक्षपदाच्या निवडणुकीत १३ विरुद्ध ७ मतांनी बाजी मारली. तारा केरकर या नगराध्यक्षपदी निवडल्या होत्या, त्या वेळी दोन्ही गटांत प्रत्येकी १० नगरसेवक होते. त्यामुळे लॉटरीद्वारे तारा केरकर यांची निवड झाली होती; परंतु चारच दिवसांनी नगराध्यक्ष केरकर व उपनगराध्यक्ष सैफुल्ला खान यांच्यावर आणलेला अविश्वास ठराव ११ विरुद्ध ९ मतांनी मंजूर झाला होता. मात्र, शुक्रवारी झालेल्या निवडणुकीत सत्ताधारी गटाच्या बाजूने १३ मते पडल्याने हा गट सध्या भक्कम झाल्याचे तसेच गेली साडेतीन वर्षे या पालिकेवर असलेले उद्योगपतीचे वर्चस्व कमी झाल्याचे दिसून येते. (प्रतिनिधी)