वास्को येथील २२ विकासप्रकल्पांना वेग: मुख्यमंत्री प्रमोद सावंत

१४० कोटींच्या निधीतून 'नवीन वास्को' उभे राहणार; २.५ कोटींच्या 'अंडरपास' पुलाचे उद्घाटन

लोकमत न्यूज नेटवर्क, वास्को : शहरात सध्या २२ महत्त्वपूर्ण विकास प्रकल्पांची कामे जोरात सुरू असून येथील विकासाची गती पाहता आमदार कृष्णा साळकर हे दिवस-रात्र शहराच्या प्रगतीसाठी कार्यरत असल्याचे स्पष्ट दिसून येते.

भविष्यात वास्कोच्या सर्वांगीण विकासासाठी सरकारने १४० कोटी रुपयांचा निधी मंजूर केला असून त्यामुळे शहरात अभूतपूर्व बदल घडून 'नवीन विकसित वास्को' नागरिकांना पाहायला मिळेल, असे प्रतिपादन मुख्यमंत्री प्रमोद सावंत यांनी केले.

काल बुधवारी (दि. ६) येथील एका महत्त्वपूर्ण प्रकल्पाच्या उद्घाटनासह दोन प्रकल्पांच्या पायाभरणी कार्यक्रमानिमित्त आयोजित समारंभात मुख्यमंत्री प्रमुख पाहुणे म्हणून बोलत होते. तानिया हॉटेल परिसरातील रेल्वे पुलाखालील कमी उंचीमुळे मांगोरहिल भागात आपत्कालीन परिस्थितीत अग्निशामक दलाला वळसा घालून जावे लागत होते. ही अडचण दूर करण्यासाठी सुमारे २.५ कोटी रुपये खर्चुन उभारण्यात आलेल्या 'अंडरपास' पुलाचे उद्घाटन मुख्यमंत्री सावंत यांच्या हस्ते करण्यात आले. यावेळी मुख्यमंत्री सावंत यांनी वास्कोत सुरू असलेल्या कामांची माहिती दिली.

याच वेळी ५४ कोटी रुपये खर्चुन उभारण्यात येणाऱ्या मल्टीपर्पज क्रीडा संकुलाच्या तसेच ८.५ कोटी रुपये खर्चाच्या मुख्याधिकारी बंगल्याच्या जागेवरील व्यावसायिक इमारत प्रकल्पाच्या पायाभरणीही करण्यात आली. कार्यक्रमाला वाहतूकमंत्री माविन गुदिन्हो, क्रीडामंत्री रमेश तवडकर, राज्यसभा खासदार सदानंद शेट तानावडे, आमदार कृष्णा साळकर, आमदार संकल्प आमोणकर, नगराध्यक्ष गिरीश बोरकर, माजी नगराध्यक्ष दीपक नाईक आदी मान्यवर उपस्थित होते.

वास्को हे 'गेटवे ऑफ गोवा'

उद्घाटनानंतर मुख्यमंत्री सावंत यांनी आमदार साळकर यांच्या कार्याची प्रशंसा केली. चार वर्षांत वास्कोमध्ये मोठ्या प्रमाणात विकास झाल्याचे मुख्यमंत्री म्हणाले. वास्को हे गोव्यातील सर्वात जुने शहर असून येथे पहिले रेल्वे स्थानक, विमानतळ आणि बंदर असल्याने 'गेटवे ऑफ गोवा' म्हणून ओळखले जाते. मात्र मागील काही वर्षे विकासाच्या दृष्टीने शहराकडे दुर्लक्ष झाल्याने अपेक्षित प्रगती झाली नव्हती. साळकर आमदार झाल्यानंतर त्यांनी विकासकामांना गती दिल्याचे सावंत यांनी नमूद केले.

'बसस्थानक प्रकल्प 'पीपीपी' तत्त्वावर'

सरकारकडून मंजूर करण्यात आलेल्या १४० कोटी रुपयांच्या निधीतून अनेक प्रकल्प लवकरच सुरू होणार असून केवळ पाच किलोमीटर क्षेत्रफळाच्या वास्कोमध्ये व्यापक बदल दिसून येतील. बसस्थानक प्रकल्प 'पीपीपी' तत्वावर उभारण्यात येणार असून नागरिकांना अत्याधुनिक सुविधा उपलब्ध होतील.

काही राजकीय विरोधक या प्रकल्पाला विरोध करत असले तरी तो पूर्णतः नागरिकांच्या हिताचा असल्याचे मुख्यमंत्री सावंत यांनी स्पष्ट केले. राज्यातील सरकारने काही वर्षात मोठ्या प्रमाणात विकास केला असून 'डबल इंजिन' सरकारमुळे भविष्यातही विकासाची गती कायम राहील. ५४ कोटींच्या क्रीडा संकुल प्रकल्पाचे काम दीड वर्षात पूर्ण करण्याचा मानस असल्याचे त्यांनी सांगितले.

क्रीडामंत्री तवडकर यांनी वास्कोतील विकासकामांची गती अधोरेखित करत क्रीडा क्षेत्रातही उत्कृष्ट सुविधा उभारण्यावर भर दिला. २०३७ मध्ये भारतात ऑलिम्पिक स्पर्धा आयोजित करण्याचे ध्येय ठेवण्यात आले असून त्यासाठी गोव्यात क्रीडा पायाभूत सुविधांचा विकास करण्यात येत असल्याचे त्यांनी नमूद केले.

आमदार साळकर यांनी मुख्यमंत्री सावंत यांच्या सातत्यपूर्ण पाठिंब्याबद्दल आभार मानत १४० कोटींच्या निधीमुळे वास्कोमध्ये मोठा विकास घडेल, असा विश्वास व्यक्त केला. कार्यक्रमात वाहतूकमंत्री गुदिन्हो, आमदार आमोणकर, नगराध्यक्ष बोरकर आदींचीही भाषणे झाली. समारंभाचे सूत्रसंचालन बायणा रवींद्र भवनाचे अध्यक्ष जयंत जाधव यांनी केले.