शासकीय वाहनाच्या धडकेत महिला गंभीर जखमी

अन्न व नागरी पुरवठा विभागाच्या वाहनाने मागून धडक दिल्याने एक महिला गंभीर जखमी झाल्याची घटना गुरूवारी

अहेरी : अन्न व नागरी पुरवठा विभागाच्या वाहनाने मागून धडक दिल्याने एक महिला गंभीर जखमी झाल्याची घटना गुरूवारी दुपारी २ वाजताच्या सुमारास अहेरीच्या एकात्मिक आदिवासी विकास प्रकल्प कार्यालयाजवळ घडली. गिता गंगाराम कोडापे (३०) रा. अहेरी असे गंभीर जखमी झालेल्या महिलेचे नाव आहे.
अहेरीचे माजी सरपंच गंगाराम कोडापे यांची मुलगी गिता कोडापे ही दुपारी २ वाजताच्या सुमारास सायकलने अहेरीकडून खमनचेरूकडे जात होती. दरम्यान एमएच ३३-४४०५ क्रमांकाच्या अन्न व नागरी पुरवठा विभागाच्या मिनी ट्रकने तिला मागून जबर धडक दिली. यात ती गंभीर जखमी होऊन घटनास्थळी बेशुध्द झाली. सदर घटनेची माहिती कळताच नातेवाईकांनी घटनास्थळावर धाव घेतली. पोलिसांनी तत्काळ सदर अपघातग्रस्त वाहन ताब्यात घेतले. अपघातातील मिनीट्रकचा चालक साईनाथ सडमेक हा दारूच्या नशेत वाहन चालवित असल्याचा आरोप जखमीच्या नातेवाईकांनी केला आहे. जखमी गिता कोडापे हिला अहेरीच्या उपजिल्हा रूग्णालयात दाखल करण्यात आले. तेथे प्राथमिक उपचार केल्यानंतर तिची प्रकृती गंभीर असल्याने तिला चंद्रपूरला हलविण्यात आले. या घटनेसंदर्भात अहेरी पोलिसांनी संबंधित वाहनचालकावर गुन्हा दाखल केला आहे. (शहर प्रतिनिधी)