लोकमत न्यूज नेटवर्क
गडचिरोली : जिल्ह्याच्या विकासासाठी दारूबंदी कायम राहणे व २०२१मधील नगर पंचायत निवडणूक दारूमुक्त होणे आवश्यक आहे, असे मत आमदार कृष्णा गजबे यांनी व्यक्त करत जिल्हा दारूबंदीला समर्थन दर्शविले.
गडचिरोली जिल्ह्यात १९९३मध्ये दारूबंदी लागू करण्यात आली. दारूबंदीमुळे जिल्ह्यातील दारूचे प्रमाण कमी झाले आहे. दारूबंदीमुळे स्त्रियांचा व जनतेचा फायदा झालेला आहे. ही दारूबंदी टिकून राहावी, यासाठी राजकीय नेते व सामाजिक कार्यकर्त्यांनी पुढाकार घेतला आहे. सोबतच जिल्ह्यातील हजाराहून अधिक गावांनी ठराव घेत मुख्यमंत्री उद्धव ठाकरे यांच्याकडे दारूबंदी कायम ठेवण्याची विनंती केली आहे.
लोकसभा, विधानसभा, ग्रामपंचायत निवडणुकीदरम्यान विविध गावांनी ठराव घेत दारूमुक्त निवडणुकीचा प्रयत्न केला आहे. विधानसभा निवडणुकीदरम्यानही आमदार कृष्णा गजबे यांनी दारूमुक्त निवडणूक व दारूबंदी मजबूत करण्याचा संकल्प केला होता. आरमोरी विधानसभा क्षेत्रातील कुरखेडा ८९, देसाईगंज २८, आरमोरी ४९, कोरची ९२ अशी एकूण २५८ गावे दारूबंदी टिकविण्यासाठी प्रयत्न करत आहेत. जिल्ह्यात दारूबंदी असल्याने आगामी निवडणूकही दारूमुक्त व्हावी, यासाठी आमदार गजबे यांनी समर्थन दिले आहे. महाराष्ट्र शासनाने कोणत्याही परिस्थितीत गडचिरोली जिल्ह्यातील दारूबंदी उठवू नये. उलट दारूमुक्तीकडे वाटचाल करण्यासाठी अधिक प्रबळ कृती करावी, अशी मागणी केली आहे.