कुलगुरू निवडीसाठी एका सदस्याची निवड

गोंडवाना विद्यापीठाच्या विद्वत्त व व्यवस्थापन समितीची संयुक्त बैठक बुधवारी गोंडवाना विद्यापीठाच्या सभागृहात दुपारी पार पडली.

गडचिरोली : गोंडवाना विद्यापीठाच्या विद्वत्त व व्यवस्थापन समितीची संयुक्त बैठक बुधवारी गोंडवाना विद्यापीठाच्या सभागृहात दुपारी पार पडली. या बैठकीला ५३ सदस्यांपैकी ३९ सदस्य उपस्थित असल्याची माहिती मिळाली आहे. गोंडवाना विद्यापीठाच्या स्थापनेनंतर मागील चार वर्षे विद्यापीठाच्या व्यवस्थापन व विद्वत्त समित्या स्थापन करण्यात आल्या नव्हत्या. त्यानंतर मे महिन्यात या समित्यांचे गठण करण्यात आले. त्यानंतर बुधवारी या विद्वत्त व व्यवस्थापन समित्यांची संयुक्त बैठक घेण्यात आली. या बैठकीला गोंडवाना विद्यापीठाचे कुलगुरू डॉ. मुरलीधर चांदेकर यांच्यासह समितीचे ३९ सदस्य उपस्थित होते. गोंडवाना विद्यापीठाला सध्या प्रभारी कुलगुरू चांदेकरांच्या रूपाने मिळालेला आहे. नवीन कुलगुरू निवड प्रक्रियेला आजच्या या बैठकीत प्रारंभ करण्यात आला. नवीन कुलगुरू नियुक्तीसाठी तीन सदस्यीय समिती गठीत केल्या जाते. विद्यापीठाच्या प्राधिकरणाच्या संयुक्त बैठकीत एका सदस्याचे नाव प्राधिकरणातर्फे निश्चित करण्यात आले आहे, अशी माहिती आहे. या नावाबाबत विद्यापीठ प्रशासनाने कमालीची गोपनियता बाळगली असून कुलगुरू डॉ. मुरलीधर चांदेकर यांच्याकडे संपर्क केला असता, त्यांनी एक सदस्याची निवड करण्यात आली, ऐवढीच माहिती दिली. त्या सदस्याचे नाव सांगण्यास त्यांनी ‘लोकमत’शी बोलताना नकार दिला. प्राधिकरणाने एक सदस्य नियुक्त केला असल्यामुळे आता राज्यपालांचा प्रतिनिधी म्हणून एक व महाराष्ट्र शासनाचा प्रतिनिधी म्हणून एक सदस्य नियुक्त केला जाईल. त्यानंतर गोंडवाना विद्यापीठाच्या नव्या कुलगुरू प्रक्रियेला प्रारंभ होईल. संयुक्त बैठकीत या विषयाव्यतिरिक्त दुसऱ्या कोणत्याही विषयावर चर्चा झाली नाही. दीड तास ही बैठक चालली, अशी माहिती मिळाली आहे. सकाळपासूनच विद्यापीठ प्रशासनाने या बैठकीबाबत प्रचंड गोपनियता बाळगलेली होती, हे विशेष.
प्राधिकरणाची संयुक्त बैठक असल्याने या बैठकीत विद्यापीठाच्या विविध अडचणी तसेच नवीन सत्रात सुरू होणारे अभ्यासक्रम आदीबाबत चर्चा होईल, अशी अपेक्षा व्यक्त केली जात होती. मात्र पहिली बैठक अवघ्या एक ते दीड तासात पार पडली. या बैठकीत एका सदस्याची निवड करण्याच्या पलीकडे महत्त्वाच्या विषयांवर चर्चा झाली नाही, अशी माहिती आहे. (जिल्हा प्रतिनिधी)