४० हजार क्विंटल धान उघड्यावर

आदिवासी विकास महामंडळामार्फत कोरची व कुरखेडा तालुक्यात एकूण १४ धान खरेदी केंद्र सुरू करण्यात आले होते. या धान खरेदी केंद्रामार्फत ३ लाख ६ हजार ५२७ क्विंटल धानाची खरेदी करण्यात आली. त्यापैकी केवळ ४५ हजार ६१० क्विंटल धानाची उचल करून भरडाई झाली. उर्वरित धान सहकारी संस्थेच्या गोदामात तर काही धान उघड्यावर ताडपत्री झाकून ठेवण्यात आले आहे.

ठळक मुद्देउन्हाळी धान खरेदीस अडचण : कोट्यवधींचे नुकसान होण्याची शक्यता

लोकमत न्यूज नेटवर्क
कोरची : पावसाळा तोंडावर आला असतानाही अजूनपर्यंत कोरची तालुक्यातील बेतकाठी, कोटगूल, बेडगाव या केंद्रांवरील जवळपास ४० हजार क्विंटल धानाची उचल करण्यात आली नाही.
आदिवासी विकास महामंडळामार्फत कोरची व कुरखेडा तालुक्यात एकूण १४ धान खरेदी केंद्र सुरू करण्यात आले होते. या धान खरेदी केंद्रामार्फत ३ लाख ६ हजार ५२७ क्विंटल धानाची खरेदी करण्यात आली. त्यापैकी केवळ ४५ हजार ६१० क्विंटल धानाची उचल करून भरडाई झाली. उर्वरित धान सहकारी संस्थेच्या गोदामात तर काही धान उघड्यावर ताडपत्री झाकून ठेवण्यात आले आहे. मागील वर्षीच्या खरीप हंगामात धानाचे उत्पादन चांगले झाले. तसेच शासनाने प्रती क्विंटल ७०० रुपये बोनस जाहीर केले होते. शासकीय खरेदी केंद्रावर मिळणारा भाव खासगी व्यापाऱ्यांच्या तुलनेत अधिक असल्याने शेतकऱ्यांनी ठोकळ धानाबरोबरच बारीक धानही विक्रीसाठी आणला. त्यामुळे मोठ्या प्रमाणात धानाची खरेदी झाली. आदिवासी विविध कार्यकारी संस्थांचे गोदाम फुल्ल झाल्याने उघड्यावरच ताडपत्री झाकून धान ठेवण्यात आले आहे. कोरची तालुक्यातील मसेली, कोरची, बेतकाठी, मर्केकसा, बोरी, कोटरा, बेडगाव, कोटगूल आदी केंद्रांवरील धान पडून आहे.
येत्या १५ दिवसांत पावसाला सुरूवात होणार आहे. पावसामुळे उघड्यावर ठेवलेले धान भिजून खराब होण्याचा धोका निर्माण झाला आहे. धान भिजल्यास आदिवासी विकास महामंडळाला कोट्यवधी रुपयांचे नुकसान सहन करावे लागणार आहे. चार वर्षांपूर्वी कोट्यवधी रुपयांचे धान फेकून द्यावे लागले. विशेष म्हणजे कोरची तालुक्यातील काही शेतकरी उन्हाळी धानाची लागवड करतात. अजूनपर्यंत खरिपाच्या धानाची उचल झाली नसल्याने उन्हाळी धान खरेदी करण्यास आदिवासी विविध कार्यकारी संस्थांनी नकार दिला आहे. खरीपाच्या धानाची लवकर उचल करावी, अशी मागणी शेतकऱ्यांकडून होत आहे.