निवेदनात म्हटले आहे की, पिंपळनेर येथील १०० बेडचे नियोजित कोविड केअर सेंटर तातडीने कार्यान्वित करून त्यात ऑक्सिजन व्हेंटिलेटरची गरज नसलेल्या, पण पॉझिटिव्ह असलेल्या रुग्णांचे तातडीने संस्थात्मक विलगीकरण करण्यात यावे. परिसरातील सर्व शासकीय आश्रमशाळांच्या इमारती ताब्यात घेऊन प्रत्येक प्रा. आ. केंद्रानुसार ५०/१०० बेडचे विलगीकरण कक्ष तातडीने उभे करण्यात यावे व मनुष्यबळासाठी परिसरातील सामाजिक संस्थांची मदत घेण्यात यावी.
गृहविलगीकरणास परवानगी दिलेल्या रुग्णांच्या घरी तशी व्यवस्था आहे का? याची तपासणी स्थानिक ग्रामपंचायत व महसूल यंत्रणेमार्फत करण्यात यावी व त्याच्या कुटुंबीयांची तातडीने अँटिजेन टेस्ट करण्यात यावी, गृहविलगीकरणात असलेले रुग्ण व त्यांचे कुटुंबीय जर १४ दिवसांच्या आत बाहेर फिरताना, नोकरीवर अथवा व्यवसाय करताना आढळल्यास अशा बेजबाबदार लोकांवर तातडीने पोलिसांमार्फत गुन्हे दाखल करण्यात यावेत व याची प्रभावी अंमलबजावणी करण्यात यावी, तसेच यासंदर्भात नागरिकांना तक्रार करण्यासाठी संपर्क क्रमांक उपलब्ध करून देण्यात यावा.
टेंभा प्रा. आ. केंद्रांतर्गत येणारे शहरातील आरोग्य उपकेंद्रांवर इदगाहपाडा, इंदिरानगर, खडक्यापाडा तातडीने लसीकरण केंद्र चालू करण्यात यावेत. ज्यामुळे ग्रामीण रुग्णालय, पिंपळनेर येथील लसीकरण केंद्रावरील अतिरिक्त ताण कमी होऊन वेगाने लसीकरण मोहीम राबविण्यास मदत होईल.
ग्रामीण रुग्णालय, पिंपळनेरमार्फत शहरातील खासगी कोविड सेंटर्समध्ये उपचार घेणाऱ्या गंभीर व गरजू रुग्णांना रेमडेसिविर इंजेक्शन मागणीनुसार उपलब्ध करून देण्यात यावीत व यासाठी आरटीपीसीआरसह सीटी स्कॅन रिपोर्ट ग्राह्य धरण्यात यावा.
पिंपळनेर ग्रामीण रुग्णालयात होणारा मृत्युदर कमी होण्यासाठी ठोस प्रयत्न व्हावेत, तसेच तिथे मृत्यू झाल्यानंतर होणारी मृतदेहाची पॅकिंग रुग्ण ॲडमिट असलेल्या कक्षात न करता त्यासाठी स्वतंत्र व्यवस्था करण्यात यावी, जेणेकरून शेजारील इतर बेडवरील रुग्णांना मानसिक धक्का बसणार नाही.