लोकमत न्यूज नेटवर्क
धुळे : येथील जाविद खाटीक यांच्या खून प्रकरणातील आरोपींना त्वरित अटक करावी, अशी मागणी करीत राज्य मुस्लीम खाटीक सेवा संस्थेच्या पदाधिकाऱ्यांनी तसेच खाटीक यांच्या नातलगांनी जिल्हाधिकारी कार्यालयाबाहेर नुकतीच निदर्शने केली.
यावेळी जिल्हाधिकाऱ्यांना निवेदन देण्यात आले. त्यात म्हटले आहे की, ८ जुलै रोजी रात्री ही घटना घडली. जाविद रज्जाक खाटीक (रा. शनि मंदिराजवळ, जळगाव) हे जळगाव येथून पिकअप गाडीत बोकड भरून कल्याणला जात असताना धुळे-मालेगावच्या दरम्यान तीन ते चार गुंडांनी त्यांचे वाहन लुटमारीच्या उद्देशाने अडविण्याचा प्रयत्न केला. गाडी थांबविली नाही म्हणून या गुंडांनी दुचाकीवरून पाठलाग करीत अंदाधुंद गोळीबार केला. यात जाविद खाटीक यांच्या डोक्याला गोळी लागली. त्यानंतर हल्लेखार पसार झाले. जाविद खाटीक यांना धुळे शहरात एका खासगी रुग्णालयात दाखल करण्यात आले. उपचार सुरू असताना ९ जुलै रोजी दुपारी २ वाजता त्यांचा मृत्यू झाला.
मुंबई-आग्रा महामार्ग, मालेगाव, चाळीसगाव या रस्त्यांवरून प्रवास करणाऱ्या बोकड व्यावसायिकांवर दरोडेखोर नेहमीच हल्ले करतात. लुटमार व हत्या करतात. त्यामुळे त्यांचा त्वरित बंदोबस्त करावा. तसेच जाविद खाटीक यांचा खून करणाऱ्या आरोपींना त्वरित अटक करून फाशीची शिक्षा द्यावी, अशी मागणी निवेदनात केली आहे.
यावेळी जिल्हाध्यक्ष ताैसिफ खाटीक, हाजी हुसनोद्दीन, युसूफ खाटीक, हाशिम कुरेशी, इमरान कुरेशी, असलम खाटीक, तरबेज खाटीक, असराफ खाटीक आदींसह पदाधिकारी आणि कार्यकर्ते उपस्थित होते.