‘पापा अभियाना’बाबत उमरग्यात बैठक

उमरगा : गटविकास अधिकारी कुलदीप कांबळे यांच्या संकल्पनेतून यावर्षी तालुक्यातील आठ जिल्हा परिषद हायस्कूलमधील गुणवत्ता वाढीसाठी ‘पापा अभियान’ सुरू करण्यात येणार आहे. या अभियानाच्या तयारीसाठी मुख्य कार्यकारी अधिकारी राहुल गुप्ता यांनी येथील जिल्हा परिषद हायस्कूलमध्ये सर्व मुख्याध्यापकांची बैठक घेतली.

यावेळी उपमुख्य कार्यकारी अधिकारी नितीन दाताळ, गटविकास अधिकारी शिवकुमार बिराजदार, मुख्याध्यापक पद्माकर मोरे, मुख्याध्यापक मधुकर मंमाळे, श्रीमती मीना सोनकांबळे, महेश कांबळे, बालाजी गाडेकर, लक्ष्मण चव्हाण, वसंत जाधव,एच. एम. तोटलवार उपस्थित होते. यावेळी बोलताना मुख्य कार्यकारी अधिकारी गुप्ता म्हणाले, ‘गुणवत्तेवर विशेष भर देऊन सर्व मुख्याध्यापकांनी गुणवत्तापूर्ण शिक्षण सर्वांसाठी ही संकल्पना राबविली पाहिजे. त्यासाठी सर्व शिक्षकांनी विशेष प्रयत्न करणे गरजेचे आहे.'

यावेळी जिल्हा परिषद प्रशालेच्या विविध उपक्रमांची पाहणी करून समाधान व्यक्त केले. जिल्ह्यात एकमेव मियावाकी जंगल निर्मितीचे कौतुकही त्यांनी केले. यावेळी दहावी परीक्षेतील गुणवंत अल्फिया अजीज मुंगले, उस्ताद सानिया राजाबाई, रमेजा जाफर उस्ताद, सम्रीन अफसर शेख यांच्यासह विशेष प्राविण्यासह उत्तीर्ण झालेल्या विद्यार्थ्यांचा गुप्ता यांच्या हस्ते सत्कार करण्यात आला. तंत्रस्नेही शिक्षक संजय रुपाजी यांनी तयार केलेल्या ‘माझी शाळा, माझे उपक्रम’ या पीडीएफचे प्रोजेक्टरवरून सादरीकरण करून कार्यक्रमाचे प्रास्ताविक करण्यात आले. सूत्रसंचालन सरिता उपासे यांनी केले. मधुकर मंमाळे यांनी आभार मानले. कार्यक्रमासाठी बशीर शेख, सोनाली मुसळे, बलभीम चव्हाण, ममता गायकवाड, सदानंद कुंभार, शिल्पा चंदनशिवे आदी उपस्थित होते.