उस्मानाबाद : उस्मानाबाद-तुळजापूर-सोलापूर रेल्वे लाइनच्या अनुषंगाने प्रस्तावित केलेल्या गावांचे संयुक्त मोजणी करण्यासाठी आवश्यक निधीचा प्रस्ताव रेल्वे विभागाने तत्काळ वरिष्ठांकडे सादर करावा, अशा सूचना खासदार ओमप्रकाश राजेनिंबाळकर यांनी दिल्या.
उस्मानाबाद-तुळजापूर-सोलापूर रेल्वे लाइन मार्गासंदर्भात रेल्वे विभागाचे अधिकारी, महसूल विभाग व उस्मानाबाद-सोलापूर जिल्ह्याचे भूसंपादन अधिकारी यांची दर महिन्याला आढावा बैठक घेतली जातेे. सोमवारी येथील जिल्हाधिकारी कार्यालयात ही बैठक पार पडली. यावेळी खा.राजेनिंबाळकर यांनी हे निर्देश दिले. प्रारंभी मागील बैठकीत दिलेल्या सूचनांच्या अनुषंगाने चर्चा झाली. हा रेल्वे मार्ग उस्मानाबाद तालुक्यातील ९, तुळजापूर तालुक्यातील १५ तर सोलापूर तालुक्यातील ९ गावांतून जातो. या सर्व रेल्वे मार्गात येणाऱ्या गावांचे सर्वेक्षण व मोजणीचे गावनिहाय प्रस्ताव दाखल करण्याच्या सूचना मागील महिन्याच्या आढावा बैठकीत दिल्या होत्या. त्या अनुषंगाने रेल्वे विभागाने महसूल विभागाकडे ३० गावांचे प्रत्यक्ष संयुक्त मोजणीसाठीचे प्रस्ताव दाखल केले असून, केवळ तीन गावांचे प्रस्ताव बाकी आहेत, ते १० सप्टेंबरपर्यंत दाखल करावे, असे निर्देश खा.राजेनिंबाळकर यांनी यावेळी दिले.
पहिल्या टप्प्यात सरकारी संयुक्त मोजणी करावी व दुसऱ्या टप्प्यात खासगी मोजणी करण्यास सांगितले. उर्वरित तीन गावांचे सुधारित सीमांकन रेल्वे विभागाने तीस दिवसांत पूर्ण करून, या गावांचेही मोजणीचे प्रस्ताव महसूल विभागाकडे द्यावेत, अशा सूचना त्यांनी केल्या.
बैठकीस आमदार कैलास घाडगे-पाटील, नगराध्यक्ष मकरंद राजेनिंबाळकर, जिल्हाधिकारी कौस्तुभ दिवेगावकर, अप्पर जिल्हाधिकारी रूपाली आवळे, भूसंपादनचे समन्वयक राजकुमार माने, सोलापूरच्या समन्वयक गायकवाड, लोंढे, मध्य रेल्वे सोलापूर विभागाचे सहायक अभियंता राजनारायण, भूमी अभिलेखचे उपअधीक्षक अशोक माने, उपविभागीय अधिकारी योगेश खरमाटे आदी संबंधित अधिकारी उपस्थित होते.