कळंबमध्ये उभारतेय महिलांसाठी व्यायामशाळा अन्‌ उद्यान

कळंब : येथील नगर परिषदेने फक्त महिलांसाठी व्यायामशाळा व उद्यानाच्या उभारणीचे काम हाती घेतले असून, जिल्ह्यात तालुका पातळीवर केवळ महिलांसाठी उभारण्यात येणारे हे पहिले सार्वजनिक उद्यान ठरणार आहे. पालिकेच्या उपक्रमाचे शहरवासीयांतून जोरदार स्वागत होत आहे.

नगर परिषदेच्या ३१ ऑगस्ट २०१९ च्या सर्वसाधारण सभेत गाळे लिलावातून संकलित झालेल्या रकमेतून शहरातील विकासकामे हाती घेण्याचा ठराव मंजूर करण्यात आला होता. शहरातील पुनर्वसन सावरगाव भागातील २४ गुंठे जागेवर व्यायामशाळेचे आरक्षण आहे. सत्ताधारी मंडळींच्या संकल्पनेतून उपनगराध्यक्ष संजय मुंदडा यांनी त्या बैठकीत या ठिकाणी महिलांसाठी व्यायामशाळा व फक्त महिलांसाठी बगीचा निर्माण करण्याचे सुचविल्यानंतर सभागृहाने एकमताने हा ठराव एकमताने मान्य केला. या ठरावानुसार त्या जागेत अंदाजे एक हजार स्क्वेअर फूट जागेत फक्त महिलांसाठी बंदिस्त व्यायामशाळा बांधली जाणार असून, उर्वरित जागेत फक्त महिलांसाठी खुले उद्यान उभारले जाणार आहे.

या कामासाठी पहिल्या टप्प्यातील ८८ लाख रुपयाच्या निविदेला मंजुरी देऊन सध्या काम सुरू करण्यात आले आहे. ज्यात संरक्षक भिंत, बंद व्यायामशाळेचे हाॅल व उद्यानाचे काम केले जाईल. दुसऱ्या टप्प्यात व्यायामशाळा हाॅलमध्ये बसावयाचे साहित्य तसेच खुल्या उद्यानात बसावयाचे व्यायाम व मनोरंजनाचे साहित्याची निविदा प्रकाशित करून काम हाती घेण्यात येणार आहे. यासाठी अंदाजे ७५ लाख रुपयाचा खर्च अपेक्षित आहे.

चौकट -

महिलांसाठी हक्काचे ठिकाण

शहरात महिलांसाठी, त्यांच्या विरुंगळ्यासाठी तसेच सार्वजनिक ठिकाणी एकत्र येण्यासाठी कोणतेही ठिकाण उपलब्ध नाही. ही बाब लक्षात घेवून पालिकेने हा प्रकल्प प्राधान्याने हाती घेतला आहे. या ठिकाणी फक्त महिलांसाठी व दहा वर्षांखालील बालकांसाठी प्रवेश ठेवला जाणार असून, या व्यतिरिक्त इतर लोकांना प्रवेश दिला जाणार नाही. या ठिकाणी संबंधिताना विनामूल्य प्रवेश असेल. अगदी देखभाल करणारे वाॅचमनदेखील महिलाच असतील, अशी सर्वसाधारण रचना असून, हा प्रकल्प पाच महिन्यांत पूर्ण करण्याचा प्रयत्न राहणार आहे.

कोट.......

फक्त महिलांसाठी, त्यांना दैनंदिन जीवनात विरंगुळा मिळावा यासाठी तसेच त्यांचे स्वास्थ्य व्यवस्थित राहावे, यासाठी हा प्रकल्प आम्ही उभा करीत आहोत. यामध्ये तांत्रिक अडथळे आले, पण जनहितासाठी सर्व यंत्रणांनी आम्हाला सहकार्य केले. अनेक अडथळ्यांवर मात करून आम्ही हा प्रकल्प पूर्ण करीत आहोत. हा वैयक्तिक माझ्यासाठी संस्मरणीय प्रकल्प राहणार आहे.

- सुवर्णा मुंडे, नगराध्यक्ष

फक्त महिलांसाठी व्यायामशाळा व उद्यान निर्माण करणारी कळंब नगर परिषद जिल्ह्यातील बहुदा पहिलीच नगर परिषद ठरेल. या प्रकल्पाचे अनुकरण जिल्हा तसेच बाहेरीलही नगरपालिका करतील अशा पद्धतीने हा प्रकल्प पूर्ण करू.

- संजय मुंदडा, उपनगराध्यक्ष

कॅप्शन - कळंब येथील सावरगाव पुनर्वसन भागातील याच ठिकाणी फक्त महिलांसाठी व्यायामशाळा व उद्यान उभारण्यात येणार आहे.