उस्मानाबाद : येथील जिल्हा रुग्णालयात मंजूर झालेला ऑक्सिजन प्लांट पूर्णत: तयार झाला आहे. मात्र, तो कार्यान्वित करण्यासाठी केंद्र शासनाच्या विस्फोटक विभागाची मंजुरी आवश्यक आहे. त्यासाठी जिल्हा रुग्णालयाने परवानगीही मागितली आहे. ती तातडीने द्यावी, अशी मागणी खासदार ओम राजेनिंबाळकर यांनी केली आहे.
जिल्ह्यातील वाढत्या कोरोना रुग्णांची संख्या लक्षात घेता जिल्हा रुग्णालयातील ऑक्सिजन प्रकल्प त्वरित सुरु करणे आवश्यक आहे. हा प्रकल्प ७ हजार ७०० घनमीटर क्षमतेचा असून, प्रस्ताव सादर करुन देखील परवाना आणि नाहरकत प्रमाणपत्र अद्याप न मिळाल्यामुळे सुरु होऊ शकलेला नाही. या प्रकल्पाद्वारे ३५० रुग्णांना ऑक्सिजन पुरविला जाऊ शकतो. उपचार केंद्रात नवीन ४० खाटांची संख्या वाढविण्यात येत आहे. त्यामुळे हा प्रकल्प सुरु होण्यासाठी परवाना आणि ना हरकत प्रमाणपत्र आवश्यक आहे. तसा प्रस्तावही जिल्हा शल्य चिकित्सक यांनी विस्फोटक विभागास सादर केलेला आहे. पण, अद्याप परवाना मिळालेला नाही. भविष्यात कोरोना रुग्णांची संख्या वाढण्याची शक्यता आहे. या प्रकल्पामुळे उस्मानाबाद जिल्ह्यातील रुग्णांवर सहज उपचार करता येतील व सर्वसामान्यांना दिलासा मिळणार आहे. त्यामुळे या ऑक्सिजन प्रकल्पास परवाना व नाहरकत प्रमाणपत्र तात्काळ देण्यात यावे, अशी मागणी खा. ओमप्रकाश राजेनिंबाळकर यांनी संयुक्त मुख्य विस्फोटक नियंत्रकांना पत्राद्वारे केली आहे.