कोरोनाने पुन्हा केली शंभरी पार

उस्मानाबाद : मागील महिन्यापासून कोरोनाबाधितांची संख्या घटू लागली होती. प्रतिदिन शंभरीच्या खालीच रुग्ण आढळून येत होते. बुधवारी दिवसभरात १०२ रुग्ण आढळून आले. कोरोना संसर्गाचा पूर्णत: धोका टळलेला नसल्याने नागरिकांनी खबरदारी घेण्याचे आवाहन आरोग्य विभागाकडून केले जात आहे.

फेब्रुवारी महिन्याच्या शेवटच्या आठवड्यात जिल्ह्यात कोरोना संसर्गाची दुसरी लाट धडकली. तेव्हापासून प्रतिदिन रुग्णांच्या संख्येत प्रतिदिन झपाट्याने वाढ होती. एप्रिल, मे महिन्यांत ६०० ते ७०० रुग्णांची नोंद होत होती. जून महिन्यापासून रुग्णांची संख्या घटू लागली. जुलै महिन्यात सरासरी ५० ते ८० रुग्ण आढळून येत होते. धोका टळलेला नसल्याने आरोग्य विभागाच्या वतीने कोरोनाबाधित रुग्णांच्या संपर्कात आलेल्या व्यक्ती व कोरोनासदृश व्यक्तींची कोरोना चाचणी केली जात आहे. बुधवारी ६५४ आरटीपीसीआर अहवाल जिल्हा रुग्णालयास प्राप्त झाले. यात ४२ जणांचा रिपोर्ट पॉझिटिव्ह आला. तर, दिवसभरात १ हजार ३३० जणांची चाचणी करण्यात आली असता, यामध्ये ६० जणांना कोरोनाची लागण झाल्याचे समोर आले. अशा एकूण १०२ कोरोनाबाधितांची भर पडली. त्यामुळे आता ॲक्टिव्ह रुग्णांचा आकडा ८२३ वर जाऊन ठेपला आहे. कोरोना संसर्गाचा धोका अद्याप पूर्णत: टळलेला नसल्याने नागरिकांनी काळजी घ्यावी, असे आवाहन आरोग्य विभागाच्या वतीने करण्यात आले. बुधवारी दिवसभरात १ रुग्णाचा मृत्यू झाला, तर ३० जण उपचाराअंती बरे झाल्याने त्यांना डिस्चार्ज मिळाला.

उस्मानाबाद तालुक्यात ४७ रुग्ण

बुधवारी जिल्ह्यात नव्या १०२ कोरोनाबाधितांची नोंद झाली. यात उस्मानाबाद तालुक्यात सर्वाधिक ४७, परंडा तालुक्यात १८, भूम तालुक्यात १३, कळंब तालुक्यात १२, तुळजापूर व वाशी तालुक्यात प्रत्येकी ४ रुग्ण, उमरगा तालुक्यात ३ तर लोहारा तालुक्यात १ रुग्ण आढळून आला.