तंबाखूच्या पाकिटाचे 15 रुपये मागितले, प्रकरण चिघळले; चहावाल्याला गोळ्या घालून तरुण पळाले

दोन तरुणांनी चहावाल्याकडून तंबाखूचं पाकिट घेतलं. चहावाल्याने 15 रुपये मागितल्यावर तरुणांनी त्याच्याशी वाद घालण्यास सुरुवात केली

उत्तर प्रदेशातील मेरठमध्ये एक धक्कादायक घटना घडली आहे. जागृती विहार एक्स्टेंशनमध्ये शुक्रवारी बुलेटवरून आलेल्या दोन तरुणांनी एका चहावाल्याची गोळ्या झाडून हत्या केली. या घटनेनंतर दोन्ही तरुणांनी घटनास्थळावरून पळ काढला. पोलीस या प्रकरणाचा अधिक तपास करत आहेत. या घटनेने परिसरात एकच खळबळ उडाली.

मिळालेल्या माहितीनुसार, दोन तरुणांनी चहावाल्याकडून तंबाखूचं पाकिट घेतलं. चहावाल्याने 15 रुपये मागितल्यावर तरुणांनी त्याच्याशी वाद घालण्यास सुरुवात केली. या वादाचं पुढे हाणामारीत रुपांतर झालं आणि नंतर आरोपीने चहा विक्रेत्यावर गोळ्या झाडल्या. यामध्ये चहावाल्याचा मृत्यू झाला आहे. 

ओंकार सिंह असं चहावाल्याचं नाव असून तो मूळचा गावंडा गावचा रहिवासी आहे. घटनास्थळी उपस्थित असलेल्या लोकांनी दिलेल्या माहितीनुसार, बुलेटवरून दोन तरुण ओंकारच्या चहा टपरीवर पोहोचले. तरुणांनी तेथून तंबाखू विकत घेतल्याचं सांगण्यात आलं. दुकानदाराने 15 रुपये मागितले असता तरुणाचा ओंकारसोबत वाद झाला. यानंतर एका तरुणाने चहा विक्रेत्यावर गोळीबार केला.

छातीत गोळी लागल्याने ओंकार जखमी होऊन रस्त्यावर पडला. या घटनेमुळे परिसरात एकच खळबळ उडाली. लोकांनी पोलिसांना माहिती दिली आणि जखमीला तातडीने रुग्णालयात दाखल केलं. तेथे डॉक्टरांनी ओंकारला मृत घोषित केलं. मृतदेह शवविच्छेदनासाठी पाठवण्यात आल्याचं वैद्यकीय निरीक्षकांनी सांगितलं. मारेकऱ्यांचा शोध सुरू आहे.