इंदूरच्या राजा रघुवंशी हत्याकांडाच्या चौकशीदरम्यान आणखी एक धक्कादायक व्हिडीओ समोर आला आहे. ज्यामध्ये लग्नानंतरच्या रिसेप्शन दरम्यान राजा आणि सोनम दोघेही खूप आनंदी दिसत आहेत. व्हिडिओमध्ये असं दिसतं की, स्टेजवर अँकरींग करणारा व्यक्ती दोघांनाही काही प्रश्न विचारतो. त्यावेळी राजा आणि सोनम एकमेकांना वचन देतात.
सोनम म्हणते की, "मी सोनम वचन देते की, लग्नानंतर राजा त्याच्या मित्रांसह कुठेही जाऊ शकतो, कुठेही पार्टी करू शकतो, मी त्याला विचारणार नाही की तो कुठे होता, कुठे गेला होता." यानंतर राजाही म्हणतो की, "मी सोनमला वर्षातून एकदा वर्ल्ड टूरला घेऊन जाईन." याच दरम्यान सोनम आणि राजा दोघेही खूप आनंदी दिसत आहेत आणि खूप हसत आहेत.
राजा रघुवंशीच्या हत्येप्रकरणी मेघालय पोलिसांनी सोनमसह पाच जणांना अटक केली आहे. मंगळवारी पोलिसांनी राज कुशवाह वगळता इतर ४ आरोपींना शिलाँगमधील राजाची हत्या झालेल्या ठिकाणी नेलं. सोनम आणि राजाचं लग्न ११ मे रोजी इंदूरमध्ये झंले. त्यानंतर २० मे रोजी दोघेही हनिमूनसाठी मेघालयातील शिलाँगला गेले. २३ मे रोजी दोघेही बेपत्ता झाले. त्यानंतर २ जून रोजी राजाचा मृतदेह सापडला.
पोलीस खूप दिवस सोनमचा शोध घेत होते. त्यानंतर ८-९ जून रोजी सोनमने अचानक उत्तर प्रदेशातील गाजीपूर येथील एका ढाब्यावरून तिच्या भावाला फोन केला. त्यानंतर पोलिसांनी सोनमला अटक केली. चौकशीदरम्यान आरोपींनी हत्येची कबुली दिली आहे. पोलिसांनी ज्या शस्त्राने राजाची हत्या केली होती तेही जप्त केलं आहे. याप्रकरणाचा अधिक तपास सुरू आहे.