भोपाळच्या सेप्टिक टँकमध्ये महाराष्ट्रातील तरुणीचा मृतदेह; 'लिव्ह-इन' पार्टनरचा भयानक अंत! टॅटूमुळे ओळख पटली

मध्य प्रदेशात गोंदियातील महिलेची निर्घृणपणे हत्या करण्यात आल्याची घटना समोर आली आहे.

MP Crime: इंस्टाग्रामवरून सुरू झालेली एक प्रेमकहाणी अत्यंत भीषण वळणावर संपली आहे. महाराष्ट्र आणि मध्य प्रदेशला हादरवून सोडणाऱ्या या घटनेत गोंदियातील ३३ वर्षीय तरुणीची तिच्या प्रियकराने गळा आवळून हत्या केली आणि तिचा मृतदेह लोहेच्या पेटीत बंद करून सेप्टिक टँकमध्ये फेकून दिला. अशरफी उर्फ सिया असे मृत तरुणीचे नाव असून, भोपाळ पोलिसांनी अवघ्या २४ तासांत या गुन्ह्याचा छडा लावला आहे.

मैत्री, प्रेम आणि फसवणूक

मूळची गोंदिया येथील रहिवासी असलेल्या सियाची सुमारे एक वर्षापूर्वी भोपाळच्या समीर नावाच्या व्यक्तीशी इंस्टाग्रामवर ओळख झाली होती. संवादाचे रूपांतर प्रेमात झाले आणि समीरसोबत संसार थाटण्याच्या स्वप्नापोटी सिया तीन महिन्यांपूर्वी आपले घर सोडून भोपाळला आली. मात्र, भोपाळला पोहोचल्यावर तिला समजले की समीर विवाहित असून त्याला दोन मुले आहेत.

घरातील वाद आणि हत्येचा कट

समीरच्या कमला नगरमधील घरात सिया राहू लागल्याने तिथे दररोज भांडणे होऊ लागली. समीरची पत्नी आणि सिया यांच्यात वारंवार वाद होत असल्याचे शेजाऱ्यांनी सांगितले. सिया समीरवर लग्नासाठी दबाव टाकत होती किंवा लग्नास नकार दिल्यास ५ लाख रुपये आणि कायदेशीर कारवाईची मागणी करत होती. याच तणावातून समीरची पत्नी माहेरी निघून गेली. सोमवारी सायंकाळी पुन्हा एकदा मोठे भांडण झाले आणि संतापलेल्या समीरने सियाचा गळा आवळून तिचा जीव घेतला.

मृतदेहाची विल्हेवाट लावण्यासाठी कुटुंबाने दिली साथ

हत्या केल्यानंतर समीरने चक्क आई, भाऊ आणि बहिणीची मदत घेतली. त्यांनी सियाचा मृतदेह एका लोखंडी पेटीत भरला आणि मध्यरात्रीच्या सुमारास जवळच असलेल्या एका रिकाम्या प्लॉटमधील सेप्टिक टँकमध्ये ती पेटी फेकून दिली. गुरुवारी सायंकाळी त्या प्लॉटजवळ मुले खेळत असताना त्यांना प्रचंड दुर्गंधी आली. नागरिकांनी पाहिले असता टँकमध्ये एक लोखंडी पेटी तरंगताना दिसली. पोलिसांनी घटनास्थळी धाव घेऊन पेटी बाहेर काढली असता, त्यामध्ये सियाचा कुजलेल्या अवस्थेतील मृतदेह सापडला.

ओळख पटवण्यासाठी 'टॅटू'चा आधार

मृतदेह पूर्णपणे कुजलेला असल्याने ओळख पटवणे कठीण होते. मात्र, सियाच्या हातावर दीपक नावाचा टॅटू आणि त्यावर २६ मे १९९२ ही जन्मतारीख कोरलेली होती. या एका पुराव्यामुळे पोलिसांनी तिची ओळख पटवली. तपासात असेही समोर आले आहे की, सियाचे यापूर्वी महाराष्ट्र आणि राजस्थानमध्ये तीन वेळा विवाह झाले होते.

पोलिसांची कारवाई

मुख्य आरोपी समीर सध्या फरार असून पोलीस त्याचा शोध घेत आहेत. मृतदेहाची विल्हेवाट लावण्यास मदत केल्याप्रकर्णी पोलिसांनी समीरचा भाऊ, आई आणि बहिणीला अटक केली आहे. समीरची पत्नी देखील संशयाच्या भोवऱ्यात असून तिची चौकशी सुरू आहे.