८ वी पास रुग्णवाहिका चालक झाला डॉक्टर, स्टेथोस्कोप घेऊन फिरायचा अन्...; किडनी रॅकेटचा पर्दाफाश

कानपूर पोलिसांनी एका मोठ्या किडनी रॅकेटचा पर्दाफाश केला आहे. यामध्ये आतापर्यंत ६० हून अधिक ट्रान्सप्लान्ट झाल्याची धक्कादायक माहिती समोर आली आहे. पोलीस आयुक्त रघुवीर लाल यांच्या निर्देशानुसार करण्यात आलेल्या या कारवाईत 'आरोही' आणि 'आहूजा' रुग्णालय सील करण्यात आली असून संचालक डॉक्टरांसह सहा आरोपींना अटक करण्यात आली आहे. ही गँग टेलिग्रामच्या माध्यमातून डोनर आणि रिसिव्हर शोधत असे. आठवी उत्तीर्ण असलेला रुग्णवाहिका चालक शिवम अग्रवाल डॉक्टर असल्याचं खोटं सांगून रुग्णांना जाळ्यात ओढायचा. रात्रीच्या वेळी गुपचूप कोणत्याही नोंदीशिवाय रुग्णालयांमध्ये या सर्जरी केल्या जात होत्या.

आठवी शिकलेला शिवम अग्रवाल रुग्णवाहिका चालक होता, पण गळ्यात स्टेथोस्कोप घालून तो डॉक्टर असल्याचं लोकांना भासवायचा. तो रुग्णांचा विश्वास संपादन करून त्यांना ट्रान्सप्लान्टसाठी तयार करत असे. तपासात असं समोर आलं आहे की, कानपूरमधील रुग्णालयांमध्ये सुमारे ४० ते ५० सर्जरी झाल्या आहेत, ज्यामध्ये एका परदेशी महिलेच्या ट्रान्सप्लान्टचाही समावेश आहे. शिवमच्या अटकेनंतरच या गुन्ह्याचे धागेदोरे हाती लागले.

या रॅकेटचं डिजिटल नेटवर्क मेरठचा डॉक्टर अफझल चालवत होता. त्याने टेलिग्रामवर एक स्पेशल ग्रुप तयार केला होता, जिथे अवयव दान करणारे आणि गरजवंत यांची भेट करून दिली जात असे. याच प्लॅटफॉर्मच्या माध्यमातून बिहारच्या समस्तीपूर येथील एमबीएर्षाचा विद्यार्थी आयुष याला डोनर म्हणून आणि मेरठच्या पारुल तोमरला रिसिव्हर म्हणून जोडलं गेलं. पैशांच्या व्यवहारापासून ते सर्जरी नियोजनापर्यंत सर्व गोष्टी पोलिसांची नजर टाळण्यासाठी या ॲपवर केल्या जात असत.

सर्जरीसाठी गुन्हेगारांनी अत्यंत चपळाईने मार्ग अवलंबला होता. सर्जरीच्या दिवशी रुग्णालयातील नियमित कर्मचाऱ्यांना सुट्टी दिली जात असे आणि एक विशेष टीम येऊन सर्जरी करत असे. त्यानंतर लगेचच रुग्णांना एका ठिकाणी हलवलं जाई, जेणेकरून कोणताही पुरावा उरणार नाही. धक्कादायक बाब म्हणजे, कोणत्याही रुग्णाची नोंद किंवा हिस्ट्री ठेवली जात नव्हती. 'आहूजा हॉस्पिटल'मध्ये अशा ७-८ सर्जरी झाल्याची पुष्टी झाली आहे.

डीसीपी वेस्ट कासिम आब्दी यांच्या नेतृत्वाखाली पोलिसांनी आरोपींना ताब्यात घेऊन चौकशी सुरू केली आहे. पोलीस फरार असलेल्या इतर आरोपींचा शोध घेत असून मोबाईल फोनची तपासणी केली जात आहे. या खुलाशामुळे उत्तर प्रदेशच्या आरोग्य विभागाच्या देखरेख यंत्रणेवर मोठं प्रश्नचिन्ह निर्माण झालं आहे. एक रुग्णवाहिका चालक इतक्या मोठ्या प्रमाणावर खोटा डॉक्टर बनून किडनी ट्रान्सप्लांट करत असल्याने एकच खळबळ उडाली आहे.