बापरे! बँक मॅनेजरने ग्राहकांच्या दागिन्यांवर लावला सट्टा; तब्बल २.७ किलो सोनं लॉकरमधून गायब

बंगळुरूमध्ये घडलेल्या धक्कादायक घटनेने बँकेच्या सुरक्षेवर गंभीर प्रश्नचिन्ह निर्माण केलं आहे. एका बँकेच्या डेप्युटी मॅनेजरने विश्वासाला तडा देत ग्राहकांचं तब्बल २,७८० ग्रॅम म्हणजेच २.७ किलो सोनं गुपचूप लॉकरमधून काढलं. त्यानंतर हे सोनं एका खासगी फायनान्स कंपनीत गहाण ठेवून ३.५ कोटी रुपयांहून अधिक रकमेवर डल्ला मारला आहे.या संपूर्ण प्रकरणातील धक्कादायक बाब म्हणजे आरोपी मॅनेजरने या पैशांचा वापर ऑनलाईन सट्टेबाजीमध्ये केला. 

गिरी नगर पोलिसांनी आरोपीला अटक केली आहे. बँकेच्या मुख्य व्यवस्थापकांनी ५ फेब्रुवारी रोजी गिरी नगर पोलीस ठाण्यात तक्रार दाखल केल्यानंतर या घोटाळ्याचा उलगडा झाला. तक्रारीत नमूद केल्यानुसार आरोपीने वरिष्ठ अधिकाऱ्यांना कोणतीही कल्पना न देता हे पाऊल उचललं. पोलिसांनी सांगितलं की, या प्रक्रियेत ग्राहकांच्या हक्कांचं उल्लंघन झालं असून ही घटना बँकिंग सुरक्षेसाठी गंभीर इशारा आहे.

तपासादरम्यान पोलिसांना काही पुरावे मिळाले आहेत. आरोपीने सोन्याच्या बदल्यात मिळालेल्या रकमेचा वापर ऑनलाईन सट्टेबाजीसाठी केला आहे. अधिकाऱ्यांच्या म्हणण्यानुसार, हे प्रकरण केवळ आर्थिक फसवणुकीचं नसून मोठा गुन्हा आहे. पोलिसांनी आरोपीला अटक केली असून आतापर्यंत सुमारे ७०० ग्रॅम सोनं जप्त करण्यात आलं आहे.

फायनान्स कंपन्यांकडून योग्य सहकार्य मिळत नसल्यामुळे पोलिसांना आता न्यायालयाचा आधार घ्यावा लागू शकतो. उर्वरित सोनं सुरक्षितपणे परत मिळवण्यासाठी पोलीस कायदेशीर पावलं उचलत आहेत. या प्रकरणाचा तपास अजूनही सुरू असून सर्व बाबी लक्षात घेऊन दोषींवर कडक कारवाई केली जाईल.

या घटनेनंतर पोलिसांनी ग्राहकांना आवाहन केलं आहे की, त्यांनी आपल्या लॉकरमध्ये ठेवलेल्या दागिन्यांची सुरक्षा आणि स्थितीची वेळोवेळी तपासणी करावी. तसेच लोकांनी बँकिंग सुरक्षा नियमांचं पालन करावं आणि कोणतीही संशयास्पद हालचाल आढळल्यास त्वरित माहिती द्यावी, असा सल्लाही दिला आहे. ही घटना ग्राहकांचा विश्वास आणि बँकिंग प्रणालीच्या सुरक्षेवर मोठं प्रश्नचिन्ह उभं करतं.