थरकाप उडवणारी घटना...! ५७ वर्षीय महिलेचे घरमालकाशीच सुरू होते प्रेम प्रकरण, मालमत्ता हडपण्यासाठी जिवंत जाळलं!

पोलिसांनी दिलेल्या माहितीनुसार, संबंधित ५७ वर्षीय सुदेष्णा जेना हिने तिच्या ७२ वर्षीय हरिहर साहू नावाच्या घरमालकाला त्यांची मालमत्ता हडपण्यासाठी जिवंत जाळले.

ओडिशाच्या गंजम जिल्ह्यातून एक अक्षरशः थरकाप उडवणारी घटना समोर आली आहे. येथे एका महिलेला तिच्या घरमालकावर रॉकेल ओतून त्याला जिवंत जाळल्याच्या आरोपाखाली अटक करण्यात आली आहे. पोलिसांनी दिलेल्या माहितीनुसार, संबंधित ५७ वर्षीय सुदेष्णा जेना हिने तिच्या ७२ वर्षीय हरिहर साहू नावाच्या घरमालकाला त्यांची मालमत्ता हडपण्यासाठी जिवंत जाळले.

या प्रकरणाची चौकशी करणाऱ्या पथकाचे प्रमुख सरवन विवेक एम यांनी दिलेल्या माहितीनुसार, विधवा जेना आणि निवृत्त महसूल अधिकारी साहू यांचे गेल्या पाच वर्षांपासून प्रेमसंबंध होते. गुरुवारी सकाळी साहू आपल्या खोलीत झोपलेले असताना, जेना त्यांच्या खोलीत आली आणि तिने त्यांच्या अंगावर रॉकेल ओतून त्यांना जाळून टाकले. गंभीररित्या भाजलेल्या हरिहर साहू यांना बरहामपूर येथील रुग्णालयात नेण्यात आले, तेथून डॉक्टरांनी त्यांना कटक येथे रेफर केले, मात्र, साहू यांना वाचवता आले नाही, असे प्राथमिक तपासातून समोर आले आहे.

संबंधित पोलीस अधिकाऱ्याने म्हटले आहे की, महिलेने केवळ तिच्या घरमालकाची नियोजनबद्ध पद्धतीने हत्याच केली नाही, तर पुरावे नष्ट करण्याचाही प्रयत्न केला. तिने साहू यांचा फोन घराच्या अंगणात फेकला आणि ज्या बाटलीतून त्याच्या अंगावर रॉकेल ओतले ती बाटलीही त्याच आगीत फेकली.

एवढेच नाही तर, आग लावल्यानंतर तिने स्वतःला निर्दोष सिद्ध करण्यासाठी साहू यांना वाचवण्याचे ढोंग करत ओरडण्यास सुरुवात केली, यानंतर, शेजारी लोकही तेथे आले. यानंतर, त्यांनी जखमी साहू यांना रुग्णालयात दाखल केले.

पोलीस अधिकाऱ्याने सांगितले की, आरोपी महिलेने मृताच्या मुलीला घटनेची माहिती दिली. यानंतर त्याची मुलगी मधुस्मिता कटक रुग्णालयात पोहोचली. साहू यांनी आपल्या मुलीला कुणीतरी आपल्या अंगावर रॉकेल ओतून पेटवून दिल्याचे सांगितल्यानंतर कथित खून प्रकरण उघडकीस आले.

या आधारावर, मृताची मुलगी मधुस्मिताने वैद्यनाथपूर पोलिस ठाण्यात तक्रार दाखल केली. तिने संबंधित महिलेवर, मालमत्ता हडप करण्यासाठी आपल्या वडिलांवर हल्ला केल्याचा आरोप केला आहे. मधुस्मिताच्या तक्रारीवरून पोलिसांनी महिलेला अटक केली.