मित्राच्या पत्नीवर जीव जडला; प्रेमात अडसर ठरणाऱ्या मित्राला गळा आवळून मारला अन्... 'असा' झाला उलगडा 

आपल्या मित्राच्या पत्नीशी असलेल्या अनैतिक संबंधांआड येणाऱ्या २६ वर्षीय जीवनलाल यादवची त्याच्याच मित्राने निर्घृण हत्या केली.

मैत्री या पवित्र नात्याला काळिमा फासणारी एक अत्यंत धक्कादायक घटना मध्य प्रदेशातील शिवपुरीमध्ये उघडकीस आली आहे. आपल्या मित्राच्या पत्नीशी असलेल्या अनैतिक संबंधांआड येणाऱ्या २६ वर्षीय जीवनलाल यादवची त्याच्याच मित्राने निर्घृण हत्या केली. इतकेच नाही तर हत्येनंतर पुरावा नष्ट करण्यासाठी मृतदेह दतिया-शिवपुरी सीमेवरील जंगलात दफन केला. मात्र, पोलिसांनी तांत्रिक तपासाच्या आधारे या प्रकरणाचा छडा लावत दोन आरोपींना बेड्या ठोकल्या आहेत.

काय आहे नेमका प्रकार? 

मृत जीवनलाल यादव (२६) हा राजगड जिल्ह्यातील खिलचीपूरचा रहिवासी होता. त्याचा मित्र छोटू ठाकूर याचे जीवनलालच्या पत्नीशी अनैतिक संबंध होते. या दोघांनाही भविष्यात एकत्र राहायचे होते, पण त्यांच्या मार्गात जीवनलाल हा मोठा अडथळा ठरत होता. हा अडथळा दूर करण्यासाठी छोटूने आपल्या एका साथीदारासह जीवनलालच्या हत्येचा कट रचला.

फिरायला नेण्याच्या बहाण्याने केला गेम 

८ जानेवारी रोजी छोटूने जीवनलालला फिरण्याच्या बहाण्याने आपल्या गावी शिवपुरीला बोलावून घेतले. आपल्या मित्रावर विश्वास ठेवून जीवनलाल बाईकवरून राजगडहून शिवपुरीला पोहोचला. मात्र, त्यानंतर तो घरी परतलाच नाही आणि त्याचा फोनही बंद झाला. घाबरलेल्या नातेवाईकांनी पोलिसात तक्रार दाखल केली. पोलिसांनी तपासाची चक्रे फिरवली आणि जीवनलालच्या मोबाईलचे कॉल डिटेल्स तपासले, तेव्हा संशयाची सुई अजय जाटव आणि छोटू ठाकूरकडे वळली.

अशी उघड झाली मर्डर मिस्ट्री 

पोलिसांनी अजय जाटव याला ताब्यात घेऊन खाक्या दाखवताच त्याने सर्व सत्य ओकून टाकले. त्याने सांगितले की, छोटू आणि त्याने मिळून जीवनलालचा गळा आवळून खून केला. त्यानंतर खाती बाबा मंदिर परिसरातील निर्जन डोंगराळ भागात वनविभागाने खोदलेल्या एका खड्ड्यात त्याचा मृतदेह गाडून टाकला. अजयच्या माहितीवरून पोलिसांनी जंगलात शोधमोहीम राबवून जीवनलालचा कुजलेल्या अवस्थेतील मृतदेह बाहेर काढला.

पत्नीच्या भूमिकेचीही चौकशी सुरू 

पोलिसांनी छोटू ठाकूर आणि अजय जाटव या दोघांनाही अटक केली असून, जीवनलालची बाईकही जप्त केली आहे. या क्रूर कटात मृत जीवनलालच्या पत्नीचाही सहभाग होता का? या दिशेने आता पोलीस कसून चौकशी करत आहेत. "हा केवळ खूनाचा गुन्हा नसून विश्वासघाताचा कळस आहे, आरोपींना कठोर शिक्षा दिली जाईल," असे पोलीस अधिकाऱ्यांनी स्पष्ट केले आहे.