शाळेत ४ वर्षांच्या बालिकेवर शिपायाकडून अत्याचार; मुंबईतील धक्कादायक प्रकार, आरोपीसह CEO अटकेत

बदनामीच्या भीतीने शाळेच्या सीईओने या प्रकाराची वाच्यता करू नये म्हणून मुलीच्या पालकांना दमदाटी केल्याचा आरोप पालकांनी केला आहे.

मुंबई - बदलापूरच्या शाळेत लहानग्या विद्यार्थिनीवरील अत्याचाराची घटना अजूनही समाजमनाला अस्वस्थ करीत असताना तसाच प्रकार मुंबईत मालाडच्या शाळेत घडला आहे. या शाळेतील ३५ वर्षीय शिपायाने चार वर्षाच्या मुलीला धमकावत तिच्यावर अत्याचार केला. पालकांनी पोलिसांत तक्रार केल्यानंतर आरोपीसह शाळेच्या मुख्य कार्यकारी अधिकाऱ्यालाही अटक करण्यात आली आहे.

ही घटना १२ जानेवारीला घडली होती. मात्र, मुलीने अलीकडेच पालकांना सांगितल्याने त्यांनी ६ फेब्रुवारीला तक्रार केली. हा प्रकार दडपण्याचा प्रयत्न शाळेच्या सीईओने केल्याचा आरोप आहे. बदनामीच्या भीतीने शाळेच्या सीईओने या प्रकाराची वाच्यता करू नये म्हणून मुलीच्या पालकांना दमदाटी केल्याचा आरोप पालकांनी केला आहे. पोलिसांनी आरोपींना न्यायालयासमोर उभे केले असता त्यांना एक दिवसाची पोलिस कोठडी सुनावण्यात आली.

कोण आहेत आरोपी ?

शाळेचा शिपाई अनिल पांचाळ (३०) आणि शाळेचा सीईओ अनंत यज्ञीक (६५) यांच्या विरोधात पोलिसांनी बीएनएस कलम ७४, ३५१ (२) आणि पोक्सो कलम १०,१७,२१ (२) अंतर्गत गुन्हा दाखल केला आहे.

संतापाची लाट

शाळेसारख्या सुरक्षित ठिकाणी अशा प्रकारची घटना घडल्याने पालकांमध्ये भीतीचे वातावरण आहे. या घटनेनंतर मालाड परिसरातील पालक आणि स्थानिक नागरिकांमध्ये तीव्र संताप व्यक्त केला जात आहे. आरोपीवर कठोरात कठोर कारवाई करावी, तसेच संबंधित शाळेची मान्यता रद्द करून प्रशासनावरही जबाबदारी निश्चित करावी, अशी मागणी नागरिकांकडून केली जात आहे.

व्यवस्थापनाचीही चौकशी

मुलीचा जबाब नोंदवण्याची प्रक्रिया पोलिसांनी सुरू केली आहे. तसेच शाळेतील सीसीटीव्ही फुटेज, कर्मचारी नोंदी आणि शाळा व्यवस्थापनाच्या भूमिकेचीही चौकशी केली जात असल्याचे सूत्रांनी सांगितले.