निम्या तालुक्यांना क्रीडा संकुलाची प्रतीक्षा

सोमनाथ खताळ , बीडग्रामीण भागातील खेळाडूला चांगल्या सुविधा मिळाव्यात, ज्या त्या तालुक्यातील स्पर्धा तेथीलच तालुका क्रीडा संकुलात व्हाव्यात, या उद्देशाने प्रत्येक तालुक्यात तालुकास्तरीय क्रीडा संकुल असावे, असे क्रीडा कार्यालयाचे धोरण आहे. मात्र येथील अधिकाऱ्यांच्या दुर्लक्षामुळे जिल्ह्यातील सहा तालुक्यांना अद्यापही क्रीडा संकुलासाठी जागाच उपलब्ध झालेली नाही. तर आहे त्या ठिकाणचे क्रीडा संकुल म्हणजे ‘असुन अडचण नसून’ खोळंबा अशी स्थिती आहे.जिल्हा क्रीडाधिकारी कार्यालयांतर्गत विविध विकास कामे करण्यात येतात. यासाठी करोडो रूपयांचा निधीही येतो. मात्र आलेला निधी वेळच्यावेळी खर्च होत नसल्याने तो निधी आहे तसा परत जातो. मागील दोन महिन्यापासून जिल्हा क्रीडा संकुलाचे कामही सुरू झाले आहे, मात्र तालुक्याच्या ठिकाणी आजही योग्य असे क्रीडा संकुल उपलब्ध नाहीत. गेवराई आणि शिरूरकासार येथील क्रीडा संकुलाच्या कामाला सुरूवात झाली होती, मात्र अर्ध्यावरच गुत्तेदारांनी हे काम सोडले. या कामासाठी पहिला हप्ता २५ लाख रूपये याप्रमाणे आला असल्याचे सुत्रांनी सांगितले.शिरूर कासार येथील क्रीडा संकुलाच्या कामाल सुरूवात झाली होती. येथे बॅडमिंटन हॉलचे कामही झाले असल्याचे सांगण्यात आले. मात्र गुत्तेदाराने मधातच काम सोडून दिले, त्यामुळे या संकुलाचे कामही आज अर्धवट स्थितीत आहे. आता तर वनविभाग व क्रीडा कार्यालय यांच्यात जागेसाठी वाद सरू असल्याची माहितीही सुत्रांनी सांगितली.पाटोदा येथेही जागा उपलब्ध होत नव्हती. आता कशीतरी जागा उपलब्ध झाली असल्याचे जिल्हा क्रीडा अधिकारी निलीमा आडसुळ यांनी सांगितले. मात्र या कामाला अद्यापही सुरूवात का झाली नाही? याचे उत्तर त्यांना देता आले नाही.गेवराई येथील क्रीडा संकुलाचे टेंडर काढण्यात आले आहे. मात्र प्रत्यक्षात येथेही कामाला सुरूवात झालेली नाही. धारूर येथेही क्रीडा संकुल आहे, मात्र याची दुरवस्था झाली आहे. अंबाजोगाई येथील क्रीडा संकुलाच्या कामाला सुरूवात झाली असून लेवलींगचे काम सुरू असल्याचे आडसुळ म्हणाल्या.जागा पाहणे सुरू- आडसुळज्या तालुक्याच्या ठिकाणी क्रीडा संकुलासाठी जागा उपलब्ध नाही, अशा ठिकाणी जागा पाहणे सुरू आहे. यातील काही तालुक्याच्या ठिकाणी जागा मिळाली आहे, परंतू फिक्स झाले नसल्याचे जिल्हा क्रीडा अधिकारी निलीमा आडसुळ यांनी ‘लोकमतशी’ बोलताना सांगितले.बीड, अंबाजोगाई, गेवराई, शिरूरकासार, धारूर येथे संकुलासाठी जागा उपलब्ध आहे. मात्र काम बंद आहे. कसल्याच प्रकारचे काम व्यवस्थीत होत नसल्याची ओरड आहे.तालुका क्रीडा समितीच्या वतीने हे क्रीडा संकुल उभारण्यात येतात. एका क्रीडा संकुलासाठी एक कोटी रूपयाचा निधी उपलब्ध होतो. मात्र निधी उपलब्ध असूनही जिल्हा क्रीडा कार्यालयाच्या दुर्लक्षामुळे आणि ढिसाळ नियोजनामुळे कुठल्याच क्रीडा संकुलाचे काम व्यवस्थीतपणे सुरू नाही.