आमठाणा परिसरात अवैध वाळूची वाहतूक

सध्या वाळूचे दर वाढलेले असून याचा फायदा उचलण्यासाठी वाळू माफियांनी कंबर कसली आहे. यावर्षी चांगला पाऊस झाल्यामुळे नद्यांमध्ये चांगली वाळू जमा झालेली आहे. कोणतीही रॉयल्टी न भरता वाळू माफिया रात्रीच्या वेळी मोठ्या प्रमाणात वाळू उपसा करीत असून बक्कळ नफा कमवीत आहेत. महसूल व पोलीस प्रशासनाचे याकडे दुर्लक्ष होत असल्याने या वाळू माफियांचे चांगलेच फावत आहेत. मात्र, रात्रीच्या वेळी जोरात वाहने चालवीत असल्याने गावकऱ्यांना याचा मोठा त्रास सहन करावा लागत आहे.