'नाईलाज आहे!', घाटी रुग्णालयात चतुर्थ श्रेणी पदांच्या रांगेत इंजिनीअर, बी. फार्मसीसह उच्चशिक्षित

३५७ पदांची सरळ सेवा भरती प्रक्रिया सुरू, घाटीतील चतुर्थ श्रेणी कर्मचारी भरती प्रक्रियेत उमेदवारांच्या कागदपत्रे पडताळणी समिती तपासत आहे.

- संतोष हिरेमठ
छत्रपती संभाजीनगर : घाटीतील चतुर्थ श्रेणी कर्मचाऱ्यांच्या ३५७पदांच्या सरळसेवा भरती प्रक्रियेचा निकाल १ जानेवारीला जाहीर झाला. गुणवत्ताधारकांच्या कागदपत्रे पडताळणीला बुधवारी सुरुवात झाली. इंजिनीअर, बी. फार्मसी, एम. एसस्सी. सह उच्चशिक्षित उमेदवार हे चतुर्थ श्रेणी पदांच्या रांगेत आहेत. एका अधिकाऱ्याने उच्चशिक्षित तरुणीला 'घाटीमध्ये सफाईचे काम करणार?', असा सवाल केला. त्यावर 'सर, नाइलाज आहे, नोकरी म्हणून करावे लागेल', असे ती म्हणाली. 

घाटी रुग्णालयाची सुरुवात होताना १९५६ मध्ये सरळ सेवेने चतुर्थ श्रेणी कर्मचाऱ्यांची पदे भरली होती. तब्बल ६९ वर्षांनंतर त्याला यावर्षी मुहूर्त मिळाला. गतवर्षी ऑगस्टमध्ये झालेल्या परीक्षांचा निकाल नव्या वर्षाच्या प्रारंभी लागला. उमेदवारांच्या कागदपत्रे पडताळणीला बुधवारी सुरुवात झाली. आगामी २८ जानेवारीपर्यंत रोज ५० ते ६० जणांच्या कागदपत्रांची पडताळणी होणार आहे.

शासकीय वैद्यकीय महाविद्यालय
पद - रिक्त पदे ः चतुर्थ श्रेणी कर्मचारी व समकक्ष पदे -३०, आया - २, माळी ७, प्रयोगशाळा परिचर - १८
शासकीय वैद्यकीय महाविद्यालय व रुग्णालय
पद-रिक्त पदे : चतुर्थ श्रेणी कर्मचारी व समकक्ष पदे- २८५, दाया - १, बॉयलर चालक १, पाणक्या - १, ड्रेसर -२, माळी - ४, नाभिक - ६