शिक्षक बापच निघाला नराधम; पोटच्या तीन वर्षाच्या मुलीवर केला अत्याचार

तीन विषयांमध्ये पदवी, इंग्रजी शाळेत शिक्षक

छत्रपती संभाजीनगर : तीन विषयांमध्ये पदवीचे शिक्षण, इंग्रजी शाळेत शिक्षक तरीही पोटच्या तीन वर्षाच्या मुलीवरच शिक्षकाने अत्याचार केला. मुलीला लघुशंका करताना वेदना सुरू झाल्यानंतर विचारपूस केल्यानंतर आई थेट ठाण्यात गेली. पोलिसांनी गुन्हा दाखल करत ३५ वर्षांच्या वडिलांना अटक केली.

बेगमपुरा पोलिस ठाण्याच्या हद्दीत ९ ते १२ ऑक्टोबरदरम्यान ही संतापजनक घटना घडली. पाेलिसांनी दिलेल्या माहितीनुसार, आठवड्याभरापूर्वी तीन वर्षांची मुलगी घरात अचानक रडायला लागली. आईने जवळ घेऊन समजून घेण्याचा प्रयत्न केला असता लघुशंका करताना रक्तस्राव होत असल्याचे तिच्या निदर्शनास आले. तिने तत्काळ डॉक्टरांकडे घेऊन गेली असता काहीशा जखमा आढळून आल्या. आईने तिला विचारण्याचा प्रयत्न केला असता तिने इशाऱ्याद्वारे वडिलांविषयी माहिती दिली.

आईला मागील काही दिवसांमध्ये पतीच्या वागण्यात संशय आल्याने त्यानेच मुलीवर अत्याचार केल्याचा दाट संशय आला. त्यानंतर आईने तत्काळ बेगमपुरा पोलिस ठाण्यात धाव घेतली. सहायक निरीक्षक हरेश्वर घुगे यांनी तक्रार दाखल करून वडिलांवर बाललैंगिक अत्याचाराचा गुन्हा दाखल केला. त्यानंतर अटक केली. न्यायालयाने त्याला २१ ऑक्टोबरपर्यंत पोलिस कोठडी सुनावली आहे. मुलगी लहान असून बाल समितीसमोर तिचा जबाब नोंदवण्याचा प्रयत्न करत आहोत. विविध अंगांनी तपास सुरू असून पुरावे गोळा करण्याचे काम सुरू असल्याचे तपास अधिकारी घुगे यांनी सांगितले.