जिल्हाधिकार्‍यांंकडून क्रीडा संकुलाची पाहणी

उस्मानाबाद : येथील श्री तुळजा भवानी जिल्हा क्रीडा संकुलाच्या झालेल्या दुरवस्थेबाबत ‘लोकमत’ने ‘तुळजा भवानी क्रीडा संकुलाची लागतेय वाट’ या मथळ्याखाली वृत्त प्रकाशित केले होते़ या वृत्ताची दखल घेत जिल्हाधिकारी डॉ़प्रशांत नरनवरे यांनी सोमवारी दुपारी पाहणी केली़ पाहणीदरम्यान झालेल्या कामांची माहिती घेत संबंधित गुत्तेदाराला दुरूस्तीच्या सूचना देण्यासह कारवाईचा इशारा देण्यात आला़ जिल्हाधिकार्‍यांनीच या संकुलाच्या कामाकडे लक्ष दिल्याने खेळाडूंमधून समाधान व्यक्त होत आहे़ शैक्षणिकनंतर क्रीडा क्षेत्रानेच उस्मानाबाद जिल्ह्याचा नावलौकिक राज्यासह देशाच्या पटलावर केला आहे़ मात्र, शहरासह जिल्ह्यातील खेळाडुंना सरावासाठी असलेल्या तुळजाभवानी क्रीडा संकुलावर कोट्यवधी रूपयांची कामे करूनही त्याचा खेळाडुृंसाठी अपेक्षित उपयोग होताना दिसून येत नाही़ मैदानाची झालेली दूरवस्था, वयोवृध्दांसाठी बनविण्यात आलेला वॉकवे, पाण्याचा अभाव, जलतरण तलावाची दुरवस्था, कुलूपबंद असलेले लॉनटेनीस मैदान, जमिनीखाली असलेले लाखो रूपयांचे वायर, विद्युत खंबाचा खेळखंडोबा, गटारीत टाकलेले पाईप, तुंबलेल्या गटारी आदी विविध प्रश्नांबाबत ‘लोकमत’ने १२ मे रोजी ‘तुळजाभवानी क्रीडा संकुलाची लागतेय वाट’ या मथळ्याखाली वृत्त प्रसिध्द केले होते़ या वृत्ताची दखल घेत जिल्हाधिकारी डॉ़ नारनवरे यांनी क्रीडा संकुलाबाबत जिल्हाधिकारी कार्यालयात बैठक घेवून विविध विभागाच्या अधिकार्‍यांची कानउघाडणी केली़ बैठकीनंतर त्यांनी मैदानावर तेथील परिस्थितीची पाहणी केली़ संबंधित उपस्थित अधिकार्‍यांना जलतरण तलावाचे लिकेज न निघण्याचे कारण गुत्तेदाराला विचारून ते काम करून घेण्याच्या सूचना दिल्या़ तसेच गुत्तेदार दुरूस्तीची कामे करणार नसतील तर त्यांच्यावर कारवाई करा, अशा सूचनाही दिल्या़ तसेच मैदानात येणारे खेळाडू, जीममध्ये येणारे खेळाडू, मिळणारे उत्पन्न याचा लेखाजोखा चोख ठेवण्याच्या सक्त सूचनाही जिल्हाधिकारी डॉ़नारनवरे यांनी दिल्या़ यावेळी संबंधित विभागाचे अधिकारी, क्रीडा कार्यालयातील अधिकारी उपस्थित होते़ जिल्हाधिकार्‍यांनी मैदानाच्या दूरवस्थेकडे लक्ष घातल्याने खेळाडुंमधून समाधान व्यक्त होत असून, मैदानावरील समस्या लवकरात लवकर दूर कराव्यात, अशी मागणी होत आहे़