स्मिता आणि पूर्वा शहाणे जोडी ठरली नं. १

औरंगाबाद : लोकमत सखी मंच यांच्या संयुक्त विद्यमाने सासू-सुनांचे नाते दर्शविणाऱ्या एका कौटुंबिक कार्यक्रमाचे म्हणजेच ‘जोडी नं. १ सासू-सून’चे आयोजन करण्यात आले होते

औरंगाबाद : जीवनाचे अनेक रंग दाखविणारे कौटुंबिक चॅनल कलर्स व स्त्रियांच्या कलागुणांना हक्काचे व्यासपीठ देणारे लोकमत सखी मंच यांच्या संयुक्त विद्यमाने सासू-सुनांचे नाते दर्शविणाऱ्या एका कौटुंबिक कार्यक्रमाचे म्हणजेच ‘जोडी नं. १ सासू-सून’चे आयोजन करण्यात आले होते. तब्बल १२ सासू- सुनांच्या जोड्यांनी या कार्यक्रमात सहभाग नोंदविला आणि कार्यक्रमाला रंगतदार बनविले.
‘जोडी नं. १ सासू-सून’ होण्यासाठी चार फेऱ्यांचे आयोजन करण्यात आले होते. यापैकी पहिली फेरी होती परिचय फेरी म्हणजेच बिनधास्त बोल फे री. या फे रीत सासू-सुनांना एका मिनिटात एकमेकींचा परिचय करून द्यायचा होता. अनेक जोड्यांची या फेरीमध्येच धांदल उडाली.
काहींनी एकमेकींवर कविता सादर करून कवितेद्वारे एकमेकींची ओळख करून दिली. विशेष म्हणजे सविता शिंदे ही नऊ महिन्यांची गर्भवतीसुद्धा या कार्यक्रमात सहभागी झाली होती.
दुसरी फेरी होती सादरीकरण फेरी. सासू-सून जोडीची एकत्रितपणे एखादी गोष्ट करण्याची हातोटी तपासणे, तसेच त्यांच्या सुप्त गुणांना वाव देणे हा या फेरीमागचा उद्देश होता. अनेक जोड्या या फेरीत प्रभावी ठरल्या. सासू-सून जोड्यांनी नाटक, भजन, गीते आणि एकत्रितपणे नृत्यसुद्धा सादर केले.
काही जोड्यांमध्ये तर आजवर कधीही व्यासपीठावर न येणाऱ्या सासूबार्इंचा उत्साह सूनबार्इंना लाजविणारा होता. सासू-सुनांमध्ये असणारा सुसंवाद या निमित्ताने दिसून आला.
यानंतर झालेल्या प्रश्नोत्तर फेरीमध्ये परीक्षकांनी या जोड्यांना प्रत्येकी एक-एक प्रश्न विचारला. स्पर्धकांचा हजरजबाबीपणा तपासणे, तसेच न बिचकता चटकन उत्तर देणे अपेक्षित होते. यात पौराणिक प्रश्नांपासून ते थेट आताच्या निर्भया प्रकरणापर्यंतचे अनेक प्रश्न विचारण्यात आले.
उत्तेजनार्थ पारितोषिके- रत्ना आणि कीर्ती बाविस्कर, लताबाई आणि सविता शिंदे, मीना आणि अश्विनी दहीहंडे आदी सासू-सून जोड्यांनी मिळविली. विजेत्यांना लोकमतचे संपादक चक्रधर दळवी, विनोदवीर प्रकाश भागवत तसेच स्नेहा कदम, परीक्षक संगीता दीक्षित, शोभा दांडगे यांच्या हस्ते पारितोषिके देण्यात आली. नीता पानसरे यांनी संचालन केले.
‘जोडी नं. १ सासू-सून’ या कार्यक्रमाची तयारी करीत असताना स्पर्धेत सहभागी झालेल्या स्पर्धकांच्या घरी कसे वातावरण असेल, यावर सादर केलेला एक विनोदी कार्यक्रम सखींना विशेष आवडून गेला.
या संपूर्ण कार्यक्रमाचे परीक्षण गायिका आणि वकील असणाऱ्या संगीता महामुनी- दीक्षित यांनी आणि अभिनेत्री- निवेदिका शोभा दांडगे यांनी केले. या सगळ्या फेऱ्यांमध्ये चांगले सादरीकरण करून आणि परीक्षकांच्या कसोटीला खरे उतरून सासू स्मिता, तर सून पूर्वा शहाणे या जोडीने विजय मिळवीत ‘जोडी नं. १ सासू-सून’ हा किताब पटकाविला. द्वितीय क्रमांक सुनीता-कीर्ती देशपांडे यांना मिळाला, तर परफेक्ट मॅचिंग करून आलेल्या मंजूषा आणि निशिगंधा काळे यांनी तृतीय क्रमांक पटकाविला.
यानंतर कलर्स फेरी घेण्यात आली. या फेरीत कलर्स चॅनलवरील ‘ससुराल सिमरन का’, ‘मेरी आशिकी तुमसे है’, ‘थपकी’, ‘नागिन’ या लोकप्रिय मालिकांमधील सासू-सुनांचे काही प्रसंग स्पर्धकांना दाखविण्यात आले. नंतर आवाज बंद करून स्पर्धकांना दाखविण्यात आलेले मालिकेतील प्रसंग जसेच्या तसे अभिनय करून सादर करायचे होते.
परफेक्ट मॅचिंग फेरीत सासू-सुनांचा पेहराव एकमेकींशी किती मिळताजुळता आहे, ते तपासले गेले. अनेक जोड्यांनी या कार्यक्रमासाठी खास खरेदी केली होती. टिकल्यांपासून ते चपलांपर्यंत तंतोतंत सारखे घालून आलेल्या जोड्यांना गुण देताना परीक्षकांची धांदल उडाली.
‘फू बाई फू ’ फेम प्रकाश भागवत आणि स्नेहल कदम यांनी प्रत्येक फेरीनंतर विनोदी चुटकुले सादर करून सर्व सखींना हसते ठेवले.