'दारूमुळे संसार उघड्यावर पडला!'; पत्नीला मारहाण करून पतीने घर, १०० क्विंटल मका जाळला

पत्नीने दारूसाठी पैसे दिले नाहीत, रागात पतीचे धक्कादायक कृती; सिल्लोड ग्रामीण पोलिसांत गुन्हा दाखल

सिल्लोड: तालुक्यातील पिपळगावपेठ येथील गणेशवाडी शिवारात दारूच्या व्यसनापायी एका पतीने स्वतःचेच घर आणि शेतातील मक्याची गंजी जाळून खाक केल्याची धक्कादायक घटना घडली आहे. पत्नीने दारू पिण्यास पैसे दिले नाहीत, या रागाच्या भरात पतीने हे निष्ठुर कृत्य केले असून यामध्ये कुटुंबाचा संसार उघड्यावर पडला आहे.

नेमकी घटना काय?
मंगळवारी रात्री ८ वाजेच्या सुमारास आरोपी सुदाम शामराव दुधे याने पत्नी पार्वताबाई यांच्याकडे दारूसाठी पैशांची मागणी केली. पैसे देण्यास नकार देताच सुदामने पत्नीला बेदम मारहाण केली. एवढ्यावरच न थांबता त्याने रागाच्या भरात घराला आग लावली. त्यानंतर शेतात असलेली जवळपास १०० क्विंटल मक्याची गंजीही पेटवून दिली.

लाखोंचे नुकसान
या आगीत घरातील अंथरुणे, संसारोपयोगी साहित्य, धान्य आणि शेतमाल जळून खाक झाला असून कुटुंबाचे लाखो रुपयांचे नुकसान झाले आहे. पतीच्या या कृत्यामुळे संतप्त झालेल्या पार्वताबाई यांनी सिल्लोड ग्रामीण पोलीस ठाणे गाठून तक्रार दिली. पोलिसांनी बुधवारी रात्री आरोपी पती सुदाम दुधे विरुद्ध गुन्हा दाखल केला असून पुढील तपास सुरू आहे.