पाटोदा तालुक्यात रस्त्यांची दुरवस्था

पाटोदा : तालुक्यातील ग्रामीण भागातील रस्त्यांची अतिशय दुरवस्था झाल्याने ग्रामस्थांना हाल सहन करावे लागत आहेत. जिल्हा परिषद व सा.बां. विभागाचे मिळून सातशे पन्नास कि.मी.चे तालुक्यात रस्ते आहेत. रस्त्यांच्या दुरूस्तीवर अनेकदा लाखोंची उधळण करण्यात येते. मात्र हे काम तद्दन असल्याचे रस्त्याची पुन्हा जैसे थे अवस्था होते.सा.बां. विभागांतर्गत लिंबादेवी फाटा ते पांढरवाडी फाटा हा जुना राष्ट्रीय महामार्ग ४० कि.मी.चा आहे. या रस्त्याची चाळणी झाली असल्याने ग्रामस्थांसह प्रवाशांचे अतोनात हाल होत आहेत. या उपविभागांतर्गत उंबरहिवरा ते डिघोळ (२५ कि.मी.), मांजरसुंबा ते पाटोदा (३२ कि.मी.), लिंबादेवी फाटा ते सौताडा (२४ कि.मी.), डोमरी - थेरला (२७ कि.मी.), कचरवाडी- वैद्यकिन्ही- पाचंग्री (२५ कि.मी.), डोंगरकिन्ही- चुंबळी (१२ कि.मी.), पिंपळवंडी- कुसळंब (१३ कि.मी.), मुगगाव - हातोला- चिंचोली (२९ कि.मी.), सौताडा- भुरेवाडी- मुगगाव (१६ कि.मी.), कुसळंब- चिंचोली (१६ कि.मी.), पाटोदा ते साकत (७ कि.मी.) असे एकूण २५० कि.मी.चे रस्ते येतात. या रस्त्यांपैकी केवळ सौताडा ते लिंबादेवी या दरम्यानचा रस्ताच चांगला आहे. इतर रस्त्यांवर मोठमोठे खड्डे पडले असल्याने रात्री- अपरात्री वाहनेही नादुरूस्त होतात. त्यामुळे आर्थिक भुर्दंड तर पडतोच; शिवाय प्रवाशांना रस्त्यातच अडकून बसावे लागते. ग्रामीण भागातील ग्रामस्थांनाही रस्त्यांमुळे ये- जा करण्यास अनेक अडचणींना तोंड द्यावे लागते. जिल्हा परिषदेच्या बांधकाम उपविभागांतर्गतही तालुक्यात ९१७ कि.मी.चे रस्ते आहेत. त्यामध्ये प्रमुख जिल्हा मार्ग (१५६ कि.मी.), इतर जिल्हा मार्ग (५७ कि.मी.) तर ग्रामीण रस्ते (३८४ कि.मी.) आहेत. यातील ६८ कि.मी. डांबरीकरण , १६० कि.मी. खडीकरण तर १५६ कि.मी.चे रस्ते कच्चे आहेत. या कच्च्या रस्त्यांमुळे शेतकऱ्यांनाही शेतीमाल घरी आणण्यासह इतर अडचणी येतात. रस्त्यांची दुरवस्था झाल्याने रस्ते दुरूस्तीसाठी जि.प. व सा.बां. विभागाकडून लाखो रुपये खर्च करण्यात येतात. मात्र ही कामेही दर्जेदार न केल्याने रस्त्याची पुन्हा जैसे थे अवस्था होते. यामुळे ग्रामस्थांचे हाल कायमच असल्याने झालेल्या रस्ता कामाची चौकशी करावी व रस्त्यांचे डांबरीकरण करावे, अशी मागणी नागरिकांमधून केली जात आहे. रस्त्यांच्या कामाबाबत सा.बां.चे उपअभियंता ल.यु. साळुंके म्हणाले की, ज्या रस्त्यांच्या कामाबाबत तक्रारी आहेत तेथील चौकशी करून दोष आढळल्यास कारवाई करू. तसेच नवीन रस्त्यांच्या डांबरीकरणासाठी निधीची मागणी केली आहे.(वार्ताहर)पाटोदा तालुक्यात ७५० कि.मी.चे रस्ते पाटोदा तालुक्यात सा.बां. विभागाचे अडीचशे कि.मी.चे तर जि.प.कडे ५०० कि.मी.चे आहेत रस्तेअनेक रस्त्यांच्या दुरूस्तीसाठी लाखोंचा खर्च करूनही रस्त्यावर पुन्हा खड्डेग्रामीण भागातील रस्त्यांची दुरवस्था झाल्याने ग्रामस्थांचे हाल कायमरस्त्यांच्या कामाची चौकशीची मागणी