वाघाळ्यातील आश्रमशाळेस महापालिकेने ठोकले सील

नांदेड : महापालिकेचा मालमत्ता कर भरण्यास टाळाटाळ केल्यामुळे वाघाळ्यातील आश्रमशाळेला शुक्रवारी सील ठोकण्यात आले़ सिडको क्षेत्रीय कार्यालयाचे सहायक आयुक्त गुलाम सादेख यांच्या विशेष वसुली पथकाने ही कारवाई केली़ चंपानगर, वाघाळा येथील मालमत्ताधारक भगवान बाबाराव इंगेवाड यांच्या आश्रमशाळेची मालमत्तेपोटी ३ लाख २ हजार ५२० रूपयांचा कर येणे बाकी होते़ शुक्रवारी त्यांच्याकडे करवसुली व जप्ती पथक गेल्यानंतरही त्यांनी कराचा भरणा करण्यास प्रतिसाद दिला नाही़ त्यामुळे त्यांच्या आश्रमशाळेला सील ठोकण्यात आले़ पाच दिवसांत संबंधितांनी त्यांच्याकडील कर न भरल्यास त्यांची मालमत्ता जप्त करून त्यांना दिलेल्या महापालिकेच्या सुविधा बंद करण्यात येतील, असा इशारा देण्यात आला़ इतर मालमत्ताधारकांनीही आपल्याकडील मालमत्ता कर भरून जप्तीची कारवाई टाळावी, असे आवाहन करण्यात आले आहे़ या मोहिमेत भालचंद्र चामे, पद्माकर कावळे, अ़ हबीब, मारूती चव्हाण, सुखदेव जोंधळे, व्यंकट गायकवाड, मालु एनफळे, सुरेश हिंंबरकर, व्यंकटी पटणे, सूर्यकांत रणवीरकर, संजय भालेराव या कर्मचार्‍यांनी सहभाग घेतला़ (प्रतिनिधी)