शौचालय जनजागृतीसाठी सीईओंकडून ‘धडे’!

बीड : शौचालयाचे महत्त्व पटवून देण्यासाठी आता प्रशासन थेट घराघरात जाऊन जनजागृती करणार आहे़ त्यासाठी शनिवारी गटसमन्वयकांना प्रशिक्षण देण्यात आले. सीईओ नामदेव ननावरे यांनी स्वत: समन्वयकांना धडे दिले.जिल्ह्याला २०१५ १६ मध्ये ७४ हजार ३४६ इतकी शौचालये उभारण्याचे उद्दिष्ट्य आहे़ लक्ष्य गाठण्यासाठी पाणीपुरवठा व स्वच्छता विभाग झपाट्याने कामाला लागला आहे़ युनिसेफने १५ साहित्यांचा समावेश असलेल्या बॅग जिल्ह्यातील गटसमन्वय, समूहसमन्वयक यांना उपलब्ध करुन दिल्या आहेत़ समन्वयांकाची संख्या ४० इतकी असून त्यांच्यामार्फत शौचलय नसलेल्या प्रत्येक कुटुंबापर्यंत पोहोचण्याचा प्रयत्न राहणार आहे. शनिवारी पाणी व स्वच्छता विभागाकडून आंतरव्यक्ती संवाद कार्यशाळा पार पडली. शौचालये उभारण्यासाठी गृहभेटी, गटचर्चा आदी कार्यक्रम आयोजित करायचे आहेत. त्यानुषंगाने ही कार्यशाळा घेण्यात आली. सीईओ ननावरे यांनी शौचालयाचे महत्त्व सामान्यांना पटवून देण्यासाठी नेमके कशा पद्धतीने लोकांपर्यंत पोहोचायचे? इथपासून ते जनजागृती कशी करायची? इथपर्यंत इथ्यंभूत माहिती पटवून दिली. बोलक्या चित्रांच्या सहाय्याने मार्गदर्शन केले. शिवाय समन्वयकांच्या अडचणीही जाणून घेतल्या. यावेळी पाणी व स्वच्छता विभागाचे उपमुख्य कार्यकारी अधिकारी सी. एम. ढोकणे यांची प्रमुख उपस्थिती होती. तज्ज्ञ मार्गदर्शक, संवादतज्ज्ञ यांची उपस्थिती होती. (प्रतिनिधी)४शौचालय योजनेचा लाभ सामान्यांपर्यंत पोहोचण्यासाठी जनजागृतीवर भर दिला जाणार आहे. त्यासाठी समन्वयकांमार्फत घरोघर संदेश पोहोचविण्यात येईल. योजना यशस्वी करण्यासाठी कसोशीचे प्रयत्न असल्याचे पाणी व स्वच्छता विभागाचे उपमुख्य कार्यकारी अधिकारी सी. एम. ढोकणे यांनी सांगितले.