कंधार-लोह्यात मनसेतील गटबाजी शिगेला

मनसेमधील दोन गटात झालेल्या कंधार शहरातील राड्याने राजकीय वर्तुळ ढवळून निघाले आहे़

कंधार: लोहा विधानसभा मतदारसंघात राजकीय उलथापालथीला वेग आला आहे़ निवडणुका तोंडावर आल्याने मोर्चेबांधणी केली जात आहे़ परंतु मनसेमधील दोन गटात झालेल्या कंधार शहरातील राड्याने राजकीय वर्तुळ ढवळून निघाले आहे़कंधार-लोह्यात माजी आ़रोहिदास चव्हाण व शिवा नरंगले यांच्यात सुप्त गटबाजी धूमसत होती़ पक्ष एक पण गटबाजी सतत उघड व्हायला लागली़ रास्ता रोको, मोर्चा हे सुद्धा गटनिहाय निघाले़ त्यामुळे दोन्ही गटाकडून शक्ती प्रदर्शन होऊ लागले़ लोहा ऩप़ निवडणुकीत माजी आ़ चव्हाण यांनी बाजी मारली़ राज्यात मनसेची स्वबळावरील ऩप़ सत्ता चर्चेत आली़ त्यामुळे चव्हाण यांना मनसेचे उपाध्यक्ष करण्यात आले़ दुसरीकडे शिवा नरंगले यांना बढती देण्यात आली़ जिल्हाप्रमुख करण्यात आले़ परंतु लोहा विधानसभा मतदारसंघाच्या बाहेर काढण्यात कोणतीही कसर ठेवली नाही़ माजी आ़ रोहिदास चव्हाणांच्या मनसे आगमनानंतर पक्षाला मोठी बळकटी आली़ परंतु गटबाजीने पक्ष पोखरल्याचे वारंवार दिसले़रोहिदास चव्हाण सलग दोन वेळा कंधार-लोह्याचे आमदार झाले़ राजकारणापेक्षा समाजकारण अधिक अशी त्यांची स्वतंत्र ओळख आहे़ आगामी विधानसभा निवडणुकीची त्यांनी जोरदार तयार केली आहे़ मराठवाड्यात कन्नडनंतर लोहा मतदारसंघात मनसेचा झेंडा फडकावण्यासाठी चव्हाण प्रयत्नात आहेत़ परंतु गटबाजीचा मोठा अडथळा त्यांना पार करण्याचे आव्हान आहे़विद्यमान आ़शंकरअण्णा धोंडगे मतदारसंघाच्या विकासाची चर्चा करत आहेत़ माजी आ़प्रताप पाटील चिखलीकर हे भगवा खांद्यावर घेवून गावोगाव फिरत आहेत़ चिखलीकरांनाही प्रा़मनोहर धोंडेंचा अडथळा आहे़ अ‍ॅड़मुक्तेश्वर धोंडगे आ़पंकजा केंद्रे यांच्या सभेची तयारी करण्यासाठी ग्रामीण भाग पिंजून काढत आहेत़ त्याचवेळी मनसेमध्ये दोन गटातील विसंवाद समोर आला असून शहरातील महाराणा प्रताप चौकात मोठा राडा झाला़ (वार्ताहर)