पावणेदोन लाख जणांची सिकलसेलची तपासणी

हिंगोली : जिल्ह्यातील १ लाख ७९ हजार १८६ जणांची विविध आरोग्य केंद्र व रूग्णालयांमध्ये सिकलसेलबाबत तपासणी करण्यात आल्याची माहिती जिल्हा आरोग्य अधिकारी डॉ. अरूण बनसोडे यांनी दिली. १९ जून हा जागतिक सिकलसेल दिन आहे. या अनुषंगाने माहिती देताना जिल्हा आरोग्य अधिकारी डॉ. अरूण बनसोडे यांनी सांगितले, सिकलसेल आजार नियंत्रण कार्यक्रमांतर्गत सोल्युबिलिटी तपासणी केली जाते. या अंतर्गत संशयित व्यक्तीची इलेक्ट्रॉफोरेसिस तपासणी केली जाते. त्यामध्ये रक्ताचे नमुने नांदेड येथील शासकीय महाविद्यालयात तपासणीसाठी पाठविले जातात. जिल्ह्यात आतापर्यंत १ लाख ७९ हजार १८६ सोल्युबिलिटी तपासणी करण्यात आली. त्यामध्ये ९३३ जणांच्या इलेक्ट्रॉफोरेसिस तपासण्या करण्यात आल्या. त्यामध्ये ३४ सिकलसेल रूग्ण तर ४८९ सिकलसेल वाहक आढळून आले. या तपासणी मोहिमेंतर्गत जिल्हा रूग्णालयात तपासणी शिबिरे घेतली जाणार आहेत. जिल्हा रूग्णालय येथे डे- केअर सेंटरमध्ये दोन खाटाची सिकलसेल रूग्णांसाठी सुविधा उपलब्ध करून देण्यात आली आहे. सिकलसेलची तपासणी मोफत केली जाते. त्यामुळे १ ते ३० वयोगटातील व्यक्तींनी गुरूवारी जिल्हा रूग्णालयात आयोजित करण्यात आलेल्या तपासणी शिबिरात तपासणी करून घ्यावी, असे आवाहन डॉ. बनसोडे यांनी केले आहे. (जिल्हा प्रतिनिधी)गुरूवारी हिंगोलीत शिबीरजिल्ह्यात आतापर्यंत १ लाख ७९ हजार १८६ जणांची सिकलसेलअंतर्गत सोल्युबिलिटी तपासणी करण्यात आली. त्याअंतर्गत जिल्ह्यातील ९३३ जणांच्या इलेक्ट्रॉफोरेसिस तपासण्या करण्यात आल्या. सिकलसेलसंदर्भात जनजागृती करण्यासाठी आरोग्य विभागाच्या वतीने घेण्यात येतात शिबिरे.१ ते ३० वयोगटातील व्यक्तींची केली जाते तपासणी.