सोबत राहण्यास नकार दिल्याने पत्नीला संपवले; अडीच तासात पती जेरबंद

Husband Killed Wife : पळून जाणाऱ्या पतीला पोलिसांनी अवघ्या अडीज तासात जेरबंद केले

वाळूज महानगर : पत्नीने तोंडी घटस्फोट देऊन सोबत राहण्यास नकार दिल्याने संतप्त झालेल्या पतीने पत्नीचा धारदार शस्त्राने वार करून तिचा निर्घृण खून केल्याची खळबळजनक घटना गुरुवारी (दि.१८) रांजणगावात उघडकीस आली होती. पत्नीचा खून करून फरार झालेला पती किरण खिल्लारे यास गुन्हे शाखा व एमआयडीसी वाळूज पोलिसांनी अवघ्या अडीच तासात गुरुवारी रात्री रेल्वे स्टेशन परिसरात जेरबंद केले.

शिवकन्या किरण खिल्लारे (२५, रा. दत्तनगर, रांजणगाव) या महिलेचा पती सतत दारू पिऊन तिला त्रास देत असल्याने तिने पतीला तोंडी घटस्फोट दिला होता. यानंतर शिवकन्या ही दीड वर्षाची मुलगी हर्षदाला सोबत घेऊन रांजणगावात किरायाच्या घरात राहण्यासाठी आली होती. शिवकन्या वाळूज एमआयडीसीतील एका कंपनीत कामासाठी जात होती. त्यामुळे दहा दिवसांपूर्वी शिवकन्याने तिची आई संगीता ससाणेला (रा. परभणी) हर्षदास सांभाळण्यासाठी रांजणगावात बोलावून घेतले होते. गुरुवारी सायंकाळी शिवकन्याचा पती किरण हा पत्नीच्या घरी गेला आणि मुलगी हर्षदाला सोबत घेऊन गेला. शिवकन्या कंपनीतून घरी आल्यावर पती किरणने ‘मी तुझे साहित्य परत देतो,’ असे म्हणून तिला लगतच्या खोलीत घेऊन गेला.

यानंतर रात्री ८ वाजेच्या सुमारास किरणने घराचा दरवाजा बंद करून पत्नी शिवकन्यावर धारदार वस्तूने सपासप वार करण्यास सुरुवात केली. शिवकन्याचा आवाज ऐकून तिची आई संगीता ससाणे मदतीसाठी गेल्या; पण दरवाजा बंद असल्याने त्या काहीच करू शकल्या नाहीत. घरमालकीण जनाबाई पवार यांनी आरडाओरडा केल्याने शेजारच्या तरुणाने लाथ मारून दरवाजा तोडला. यावेळी शिवकन्या रक्तबंबाळ अवस्थेत दरवाजाबाहेर येऊन कोसळली. यानंतर किरण खिल्लारे हातातील धारदार वस्तू फेकून देत अंधारात पसार झाला. या हल्ल्याची माहिती मिळताच रांजणगावचे माजी सरपंच मोहनीराज धनवटे, दीपक सदावर्ते यांनी घटनास्थळी धाव घेऊन गंभीर जखमी शिवकन्याला उपचारासाठी शासकीय रुग्णालयात दाखल केले असता डॉक्टरांनी तपासून तिला मृत घोषित केले.

फरार पती रेल्वे स्टेशनवर जेरबंद
शिवकन्याचा खून केल्यानंतर पती किरण पसार झाला होता. पोलीस उपायुक्त अर्पणा वनकर, सहा. पोलीस आयुक्त विवेक सराफ, पोलीस निरीक्षक संदीप गुरमे, पोकॉ. अविनाश ढगे, योगेश शेळके, कच्चे, वाघ आदींनी घटनास्थळी जाऊन पंचनामा केला. यानंतर आरोपीला पकडण्यासाठी एमआयडीसी वाळूज व गुन्हे शाखेच्या पथकाने रेल्वे स्टेशन व बस स्टॅन्डवर सापळा रचला होता. किरणचे मोबाइल लोकेशन रेल्वे स्टेशन परिसरात दिसल्याने पोहेकॉ. दशरथ खोसरे, पोकॉ. पवार व गुन्हे शाखेच्या पथकाने रात्री १०.१५ वाजेच्या सुमारास सापळा रचून रेल्वेमधून पसार होण्याच्या तयारीत असलेल्या किरण केशव खिल्लारे (रा. देगाव जि. नांदेड) यास शिताफीने पकडले. किरणला न्यायालयात हजर केले असता २२ नोव्हेंबरपर्यंत पोलीस कोठडी सुनावण्यात आली आहे. याप्रकरणी पुढील तपास पोलीस निरीक्षक संदीप गुरमे यांच्या मार्गदर्शनाखाली सहा. निरीक्षक मदनसिंग घुनावत करीत आहेत.